‘आकृति एडभर्टाइजिङ’ द्वारा भोटेकोशी बाढीपीडितका लागि ५ लाख ५५ हजार सहयोग

अर्थ र बाणिज्य

विराटनगर । विराटनगरस्थित आकृति एडभर्टाइजिङका प्रबन्धक निर्देशक मनोज चौहानले भोटेकोशी बाढी प्रभावितको उद्धार, राहत तथा पुनःस्थापनाका लागि प्रधानमन्त्री दैवी प्रकोप उद्धार कोषमा ५ लाख ५५ हजार रुपैयाँ सहयोग गरेका छन्। चौहानले सोमबार सहयोग रकमको भौचर मोरङका सहायक प्रमुख जिल्ला अधिकारी सरोजराज कोइरालालाई हस्तान्तरण गरेका हुन्।

भोटेकोशी नदीमा आएको विनाशकारी बाढीले ठूलो जनधनको क्षति पुयाएको उल्लेख गर्दै चौहानले विपद्को कठिन घडीमा पीडितप्रति मानवीय ऐक्यबद्धता आवश्यक रहेको बताए । ‘विपद्का बेला सहानुभूति व्यक्त गरेर मात्र दायित्व पूरा हुँदैन,’ उनले भने, ‘पीडितको उद्धार, राहत र पुनःस्थापनामा हातेमालो गर्नु नै वास्तविक मानवीय जिम्मेवारी हो।’

बाढीबाट प्रभावित परिवारको राहत तथा पुनःस्थापनामा सहयोग पुगोस् भन्ने उद्देश्यले प्रधानमन्त्री दैवी प्रकोप उद्धार कोषमा रकम उपलब्ध गराइएको उनले बताए । सहयोग रकमको भौचर बुझ्दै मोरङका सहायक प्रमुख जिल्ला अधिकारी कोइरालाले विपद्को समयमा व्यक्ति तथा संस्थाबाट प्राप्त सहयोगले प्रभावित नागरिकलाई राहत पुयाउन महत्वपूर्ण भूमिका खेल्ने बताए । उनले भोटेकोशी बाढीबाट प्रभावित नागरिकको उद्धार, राहत तथा पुनःस्थापनाका लागि अन्य व्यक्ति तथा संस्थालाई समेत सहयोग गर्न आग्रह गरे ।