शरदकुमार गौचन हत्यामा संलग्न सुटरसहित ५ पक्राउ, मुख्य आरोपी समिरमान भने फरार

प्रदेश

काठमाडौं, २८ कात्तिक । नेपाल निर्माण व्यवसायी महासंघका अध्यक्ष शरदकुमार गौचनको हत्यामा संलग्न सुटरसहित ५ जना पक्राउ परेका छन् । पक्राउ परेकाहरु प्रहरीले पत्रकार सम्मेलन गरी सार्वजनिक गरेको छ । मुख्य योजनाकार भने अझै फरार छन् ।

पक्राउ पर्ने मध्ये नुवाकोटका राजिव तामाङ स्याङटाङ सुटर भएको प्रहरीले बताएको छ । सार्वजनिक गरिएका अन्यमा मुकेशकुमार पाडे, सन्तोष गुरुङ, प्रकाश बुढाथोकी र शिवजी महतो रहेका छन्। मनोज पुन र मुख्य आरोपी समिरमान लगायत आठ जना फरार रहेको प्रहरीले जनाएको छ ।

लामो समयको अनुसन्धानपछि घटनामा संलग्नलार्इ पक्राउ गरेको प्रहरीले जनाएको छ। गत असोज २३ गते दिउँसो २ बजेर ४५ मिनेटमा बानेश्वरमा रहेको घरबाट निस्केर गाडीमा चढी केही मिटर पर नपुग्दै मोटरसाइकलमा आएका दुई व्यक्तिले गौचनलाई गोली हानेका थिए।

गोली लागि घाइते भएका गौचनको उपचारका क्रममा मृत्यु भएको थियो। प्रहरीले डिआइजी गणेश केसीको नेतृत्वमा छानविन समिति गठन गरी अनुसन्धान गरिरहेको थियो।ठेक्कापट्टाको विषयलाई लिएर हत्या भएको अनुसन्धानबाट खुलेको छ।