देउवाका यि मन्त्रीले प्रहरीलाई बीच सडकमै सलामी हान्न लगाए

काठमाडौं, २९ कात्तिक । सरकारका मन्त्रीहरु बेलाबेलामा विवादमा तानिने गरेका छन् । मन्त्रीहरुको लागि नीति नियम नहुँदा वा चर्चामा आउनको लागि हो अनेकन हर्कत गर्दै आउने गरेका छन् । पहिला मन्त्री बन्न मरिहत्ते गर्ने र पछि चर्चामा आउन वा सेलिब्रेटी बन्न यस्ता हर्कत गर्ने गरेका छन् ।

मानसम्मान कै लागि भएपनि उनीहरु मन्त्री पदका लागि हानथाप गर्ने गर्दछन् । उच्च सुरक्षा, साईरन जडित गाडीलगायतका सुविधा पाइन्छ। सेना–प्रहरी लगायत सुरक्षा निकायको सलामी पनि पाइन्छ।

यस्ता सम्मान पाएपछि आफूलाई समर्थन गर्छन्, प्रधानमन्त्रीमा टिक्न सजिलो हुन्छ भनेर होला, प्रधानमन्त्री शेरबहादुर देउवाले ६४ जनाको मन्त्रीमण्डल बनाएका छन्। औपचारिक सलामी त्यस्ता व्यक्तिलाई दिइन्छ, जसको गाडीमा नेपालको राष्ट्रिय झण्डा फहराएको हुन्छ। तर, बुधबार सुर्खेतबासीले सडकमा एउटा रोचक दृष्य देख्न पाए।

हिँडिरहेका एकजना व्यक्ति बुद्धमार्गस्थित मूल सडकमा नै प्रहरीबाट सलामी लिइरहेका थिए। ती व्यक्तिले प्रहरीबाट लिइरहेको दृष्य सडक वरिपरि रहेका स्थानीयवासीले रमाइलो मानेर हेरिरहेका थिए। पछि स्थानीयवासीले थाहा पाए, उनी सञ्चार राज्यमन्त्री तप्तबहादुर बिष्ट पो रहेछन्।

सुर्खेत–३ का निवर्तमान सांसद बिष्ट अहिले सुर्खेत–२ (ख) बाट प्रदेश सभामा उम्मेदवार छन्। उनले बीच सडकमै प्रहरीबाट सलामी लिएका हुन् । ओहोदाका कारण बिष्ट प्रहरी सलामीका भागेदार होलान्। तर के बीच सडकमा यसरी सलामी लिइदिने दिने अभ्यासले मन्त्री पदको गरिमा बढ्ला ?

Comments