२० मेगावाटको तल्लो मोदी दसैँअघि

अर्थ र बाणिज्य

पर्वत ७, असोज । पर्वत जिल्लामा निर्माण भइरहेको तल्लो मोदी जलविद्युत् आयोजनाले दसैँअघि उत्पादन सुरू गर्ने बताएको छ।

२० मेगावाट क्षमताको सो आयोजनाले गत वर्षकै असारमा उत्पादन गर्ने भनिए पनि दसैँअघि मात्र उत्पादन दिने जनाएको हो।

स्थानीयवासीको अवरोध र प्राकृतिक प्रकोपलगायतका कारणले निर्माणमा ढिलाइ भएको र तोकिएको मितिमा निर्माण हुननसकेको भनाइ आयोजनाको छ।

आयोजनाले ६० महिनामा उत्पादन सुरू गर्ने लक्ष्य लिएर विसं २०६९ साउनमा काम थालेको थियो।

‘वर्षामा पहिरो जाने, भासिने र आयोजनाभित्रै बाढी पस्नेजस्ता प्राकृतिक जटिलताका कारणले उत्पादन तोकिएको मितिमा हुन सकेन’, आयोजना प्रमुख पवनकुमार यादवले भने, ‘अब हामी छिट्टै नै उपलब्धि देखिने गरी काम गर्दैछौं।’

उनले निर्माणकै क्रममा देशमा विभिन्न चरणका चुनाव भएको र सोका कारण समेत काम समयमै सक्न केही ढिलाइ भएको स्वीकार गरे। अहिले काम तीव्र गतिमा भइरहेको र दसैँ अगाडि सक्नेमा शंका नगर्न उनले आग्रह गरे।

आयोजनाको वार्षिक ११ करोड ७० लाख युनिट विद्युत् उत्पादन गर्ने लक्ष्य छ। कुश्मा नगरपालिका र मोदी गाउँपालिका यो आयोजनाका प्रभावित क्षेत्र हुन् । मोदी गाउँपालिकाको तिलाहारबाट चार हजार २०० मिटर लामो सुरुङ बनाएर आयोजनाको पावरहाउस कुश्मा नगरपालिका–८ परादीमा राखिएको छ ।

रु तीन अर्ब ६० करोडको लागत स्टिमेटमा निर्माण सुरू भएको आयोजनाले निर्धारित समयमा उत्पादन दिन नसकेपछि लागत बढ्दै गएको छ। आयोजनाको अहिले ९५ प्रतिशत काम सकिएको छ।

Comments

प्रकाशित मिति : 2018-09-23

२० मेगावाटको तल्लो मोदी दसैँअघि

Comments

अरु समाचार