नेपाल लाइफ इन्स्योरेन्सले ल्यायो ५० लाख वरावरको घातक रोग जोखिम वहन स्किम

अर्थ र बाणिज्य

- न्युज-नेपाल

चैत्र १३, काठमाडौं । नेपाल लाइफ इन्स्योरेन्सले घातक रोगको जोखिम बहन गर्न भन्दै आकर्षक बीमा योजना सार्वजनिक गरेको छ ।

कम्पनीले घातक रोगहरू (क्रिटिकल इल्नेस) को जोखिम बहन गर्न ५० लाख रुपैयाँसम्मको ‘घातक रोग सुविधा योजना’ नामक बीमा योजना सार्वजनिक गरेको हो ।

कम्पनीका प्रमुख कार्यकारी अधिकृत विवेक झाले सर्वसाधारणलाई घातक रोग लाग्दा आर्थिक संकट आइ नपरोस भन्ने उद्धेश्यले यो योजना सार्वजनिक गरेको जनाए । उनले भने, अहिले विश्व मै घातक रोगका कारण मान्छेहरु समस्यामा फसेका छन् । आर्थिक पाटो समेत धेरै महंगो हुने हुनाले बीमाको विकल्प सोच्न कम्पनी बाध्य भएको हो ।

कम्पनीका अनुसार यो पूरक करार (थप सुविधा) लिएपछि बीमा अवधिमा तोकिएका घातक रोग लागेमा बीमाले जोखिम बहन गर्नेछ। साविकको योजना बीमा अवधिसम्म चालू रहनेछ। यस पूरक करारले थप जोखिम बहन गर्नेछ। ऐच्छिक सुविधा दिने पूरक करार पहिला कुनै पनि योजनाको जीवन बीमा गरेका बीमित वा नयाँ बीमितले तोकिएका शर्तहरू पूरा गरी यो थप सुविधा लिन सक्ने विज्ञप्तिमा उल्लेख छ।

यो योजनामा क्यान्सर, अन्तिम चरणको मृगौला विफलता, प्राथमिक पल्मुनरी धमनी उच्च रक्तचाप, सिम्पटम्स मल्टिपल स्क्लेरोसिस, मुख्य अंग प्रत्यारोपण, ओपन चेष्ट सीएबीजी, महाधमनीको शल्यक्रिया, ओपन हार्ट सर्जरी वा मुटुका भल्भहरूको मर्मत, मष्तिस्कघात, माइयोकार्डिअल इन्फ्राक्सन वा पहिलो हृदयाघात, कोमा, पूर्ण अन्धोपन, स्थायी रूपले भएको अंगहरूको पक्षाघात, अन्तिम चरणको कलेजोको विफलता, अन्तिम चरणको फोक्सोसम्बन्धी रोग, अल्जाइमर्स रोग, पार्किन्सन्स रोग, तेस्रो डिग्रीमा पोलेको/डढेको गरी विभिन्न रोगहरू समावेश गरिएको छ।

यो योजनामा सहभागी हुन नियमित बीमाशुल्कमा न्यूनतम रकम मात्र थप गरे पुग्ने कम्पनीले जानकारी गराएको छ। कम्पनीले बीमितलाई ६५ देखि ८२ रुपैयाँसम्म प्रति हजारमा बोनस दिइरहेको छ।

कम्पनीको चुक्ता पूँजी ४ अर्ब ४० करोड रुपैयाँ रहेको छ। सर्वाधिक जीवन बिमा कोष ५९.४९ अर्ब, सर्वाधिक लगानी ६५.९८ अर्ब छ।