अमेरिकाबाट खोप ल्याउन सरकारले थाल्यो कूटनीतिक प्रक्रिया

समाचार

- न्युज नेपाल

काठमाडौं । सरकारले अमेरिकाबाट खोप ल्याउन प्रक्रिय अघि बढिसकेको जनाएको छ ।

परराष्ट्रमन्त्री प्रदीपकुमार ज्ञवालीले अमेरिकाले अन्य मुलुकलाई दिने भनेको ६ करोड खोप ल्याउन प्रक्रिया सुरु भैसकेको जनाएका हुन् ।

कांग्रेस नेता गगनकुमार थापाले अमेरिकाबाट खोप ल्याउनका लागि कूटनीतिक प्रक्रिया अघि बढाउन आग्रह गरेका थिए । उनको जवाफमा परराष्ट्रमन्त्री ज्ञवालीको उक्त जानकारी प्रकाशमा आएको हो ।

कांग्रेस नेता थापाले अमेरिकाले अन्य मुलुकलाई दिने भनेको ६ करोड अस्ट्राजेनेका खोप आपूर्ति हुनसके दक्षिण एसियाली मुलुक लाभान्वित हुने जनाएका थिए ।

अमेरिकाले स्टकमा राखेको उक्त परिमाणको खोप अन्य मुलुकमा आपूर्ति गर्न लागेको जनाइएको छ । तर, कतिपय संघसंस्था र मुलुकले अमेरिकाले खोप स्टक राखेको र अन्यत्र अभाव भैरहेको भन्दै अमेरिकाको आलोचना गरिरहेका छन् ।

नेपालमा भारतको सिरम इस्टिच्युटले उत्पादन गरेको अस्ट्राजेनेका-अक्सफोर्डको कोभिसिल्ड खोप आपतकालिन प्रयोगमा आइसकेको छ ।