रथी यमबहादुरको सुविधा थपेकाेमा पूर्व जर्नेलहरूको आपत्ति

समाचार

- न्युज नेपाल

काठमाडौं । नेपाली सेनाका सहायक रथी यमबहादुर अधिकारीकाे सेवा अवधि थप अवधि थपेकोमा पूर्व जर्नेलहरूले आपत्ति जनाएका छन्।

सेना समायोजनका क्रममा माओवादी लडाकुबाट नेपाली सेनामा प्रवेश गरेका यमबहादुर अधिकारीलाई नियमविपरीत दोस्रोपटक राजनीतिक जोडबलमा उनकाे पद तीन वर्षका लागि थप गर्ने निर्णय गरिएकाे थियाे।

सचेत नागरिक, वीरगति प्राप्त सैनिक परिवार र पूर्वसैनिकहरूले विज्ञप्ति जारी गर्दै यस्तो गलत अभ्यासले नेपाली सेनामा गलत अभ्यास बस्ने र सेनामा कार्यरत सकल दर्जाकाे मनाेबल खस्किने जनाएकाे छ।

राजनीतिक दवावमा रथी अधिकारीलाई तीन वर्ष समयअवधि थप गरिएकाेमा नेपाली सेना माओवादीकरण भएकाे हाे भन्दै जटिल प्रश्न खडा गरेकाे विज्ञप्तिमा उल्लेख छ।

विज्ञप्तिमा नियमविपरीत गलत अभ्यासले नेपाली सेनाको गाैरवमा आँच आएकाे जनाउँदै नेपाली नागरिक, वीरगतिप्राप्त सैनिक परिवार तथा अवकाशप्राप्त सैनिक परिवारको समेत अवमूल्यन भएकाे जनाइएकाे छ।

नेपाली सेनाले राजनीति नगरी नेपालवाद मात्र बुझ्ने संस्था भएकाले निर्णय तत्काल फिर्ता लिन तथा यस्ता खालका कार्य नगर्नसमेत विज्ञप्तिमा सचेत गराइएकाे छ।

माओवादीसहितको तत्कालीन केपी ओली नेतृत्वको मन्त्रिपरिषदले सेना समायोजनका क्रममा माओवादी लडाकुबाट नेपाली सेनामा प्रवेश गरेका यमबहादुर अधिकारीलाई सहायक रथीको विशेष पद सिर्जना गरेर बढुवा गरेको थियो।

चार वर्षका लागि गरिएको बढुवा गत कात्तिक १ गते सकिने अवस्थामा माओवादीका पूर्व सुप्रिमो पुष्पकमल दाहाल ‘प्रचण्ड’ प्रधानमन्त्री भएका बेला उनको पद थप तीन वर्षका लागि थप्ने निर्णय गरेको थियाे।

सरकारको यस निर्णयप्रति नेपाली सेनाभित्र चर्को असन्तुष्टि देखिएको थियाे।

सैनिक स्रोतका अनुसार प्रधानसेनापतिले अधिकारीको सेवा विस्तारबारे वरिष्ठ सैनिक अधिकारी (पिएसओ)समक्ष परामर्स गरेका थिएनन्।