अन्ततः ब्याक भयो राप्रपाः आन्दोलन शान्तिपूर्ण हुने दाबी, सरकारलाई यस्तो अपिल

काठमाडाैं । राष्ट्रिय प्रजातन्त्र पार्टीले आइतबारको प्रदर्शन प्रतिकात्मक र शान्तिपूर्ण हुने बताएको छ ।

सरकारले निषेधाज्ञा तोड्ने वा कानूनको उल्लङ्घन गर्न खोजे कारबाही गर्ने चेतावनी दिएपछि राप्रपा अध्यक्ष राजेन्द्र लिङ्देनले शान्तिपूर्ण आन्दोलन गर्ने प्रतिक्रिया दिएका हुन् ।

सरकार निरंकुश बनिरहेको आरोप लगाएका लिङ्देनले भनेका छन्, ‘भन्नलाई प्रजातन्त्र, लोकतन्त्र, गणतन्त्र भन्ने तर जनतालाई यति मात्र बोल यो यो मात्र बोल, अनि यो बाटो मात्र हिँड, यहाँभन्दा एक इन्च पनि यता नआउ भनेर सीमा तोक्ने सरकारी निरङ्कुशतन्त्रको विरुद्धको प्रतिकात्मक र शान्तिपूर्ण प्रदर्शन हो । जहाँ हामी सीमित नेताहरू मात्रै सहभागी हुनेछौँ ।’

राजसंस्था, हिन्दु राष्ट्र लगायतका मुद्दा बोकेर आन्दोलनमा उत्रिएको राप्रपाले आन्दोलनमा सिमित नेताहरु मात्रै उपस्थित हुने भनेको छ। राप्रपा नै वैचारिक दृष्टीकोणले प्रमुख प्रतिपक्षी पार्टी भएको लिङ्देनको दाबी छ । राप्रपाको आन्दोलनबाट सरकार डराउनु नपर्ने लिङ्देनको दाबी छ । राप्रपाले आज बिजुलीबजारबाट आन्दोलन गर्ने भनेको छ ।

केहिदिन पहिले मात्रै राप्रपाले निषेधाज्ञा तोड्ने चेतावनी दिएको थियो । पूर्वराजा ज्ञानेन्द्र शाहसँग शनिवार लञ्च मिटिङ गरेपछि राप्रपाले आन्दोलनको रणनीति फरक ढंगले लैजाने तयारी गरिरहेको भनिन्छ । राजसंस्थाको पक्षमा माहोल निर्माण गर्न पूर्वराजा ज्ञानेन्द्रले जोडतोडका साथ लाग्न भनेका छन् ।

Comments