नौबिसे–नागढुङ्गा सडक १० रात बन्द हुने

अर्थ र बाणिज्य

काठमाडौं । नौबिसे–नागढुङ्गा सडक १० दिनका लागि रातको समयमा बन्द गरिने भएको छ ।

यही वैशाख २२ देखि वैशाख ३१ गतेसम्म राति ११ देखि बिहान ३ बजेसम्म सडक निर्माण भइरहेकाले सम्भावित जोखिमबाट बच्न सवारीसाधन आवतजावत रोकेर सडक निर्माणको काम गर्न लागिएको हो ।

नागढुङ्गा–पिप्लामोड क्षेत्रमा सडक निर्माण भइरहेकाले रातिको समयमा सडक बन्द गरेर काम गर्न लागिएको जिप्रका सहायक प्रमुख जिल्ला अधिकारी मोहनप्रसाद न्यौपानेद्वारा जारी सूचनामा उल्लेख गरिएको छ ।

काठमाडौंबाट नौबिसेतर्फ जाने हलुका तथा भारी सवारीसाधनलाई राति नागढुङ्गा चेकपोष्टमा र नौबिसेबाट काठमाडौंतर्फ आउने सवारीसाधनलाई खत्रीपौवा पुलमा रोकिने सूचनामा उल्लेख छ ।

त्यस्तै वैकल्पिक बाटोका रूपमा सामाखुसी–टोखा–गुर्जेभञ्ज्याङ–छहरे–त्रिशूली–गल्छी सडक हुँदै जान सकिने छ । त्यस्तै, सवारीसाधनलाई वैकल्पिक सडक प्रयोग गर्न नागढुङ्गा–मुग्लिन सडक योजना कार्यालयले आग्रह गरेको छ ।

एम्बुलेन्स र सुरक्षा निकायका सवारीसाधनलाई नरोकिने सूचनामा उल्लेख गरिएको छ ।