सडक भासिएपछि अवरुद्ध अरनिको राजमार्ग पुनः सञ्चालनमा

अर्थ र बाणिज्य

काठमाडौं । सडक भासिएर बन्द भएको अरनिको राजमार्ग पुनः सञ्चालनमा आएको छ । सो राजमार्ग भएर अहिले सबै सवारीसाधन चल्न थालेका छन् । सडक डिभिजन कार्यालय चरीकोटको प्रयासमा स्थानीय प्रशासन, स्थानीय सरकार र सुरक्षा निकायसँगको सहकार्यमा अवरुद्ध राजमार्ग सञ्चालनमा आएको हो ।

सडक डिभिजन कार्यालय चरिकोट अन्तर्गतका निर्माण व्यवसायीहरुले एक्साभेटर, ट्रिपर, डोजर लगायत प्रयोग गरि सडक पुनः सञ्चालनमा ल्याएको डिभिजन प्रमुख अमित कुमार श्रेष्ठले न्यूज नेपाललाई जानकारी दिनु भयो ।

सिन्धुपाल्चोकको भोटेकोशी गाउँपालिकाको वडा नम्बर २ स्थित इकुमा बिहीबार बिहान करिब ५० मिटर सडक भासिँदा अरनिको राजमार्ग पूर्णरूपमा अवरुद्ध भएको थियो । फेरि डिभिजन कार्यालयको प्रयासमा सञ्चालनमा ल्याइएकोमा सोहीदिन राति भासिएको थियो ।

रातदिनको प्रयासपछि शनिवारदेखि साना गाडी चल्न थालेका थिए । आइतबार बिहानदेखि भने मालबाहकलगायत सबै सवारीसाधन सञ्चालनमा आएका छन् । सडक सुचारु भएपछि मालवाहक कन्टेनरहरू तातोपानी नाका हुँदै काठमाडौंतर्फ आएका छन्। यस्तै बाटोमा रोकिएका यात्रुबाहक बस, निजी सवारी र एम्बुलेन्स सबै सञ्चालनमा आएका छन् ।

अरनिको राजमार्ग भएर नेपालबाट चीनतर्फ घीउ, पीठो, खाद्यान्न, हस्तकला र छालाका सामानहरू निर्यात हुने गर्दछ भने चीनबाट नेपालतर्फ खासगरी तयारी पोसाक, फलफूल, विद्युतीय सामग्री, छाता, मोबाइल, जुत्तालगायत आयात हुने गर्दछ ।