राजस्व अनुसन्धान विभागमा अझैं पठाइएन डीजी, के गर्दैछ प्रधानमन्त्री कार्यालय ?

काठमाडाैं । प्रधानमन्त्री कार्यालय मातहतको राजस्व अनुसन्धान विभागमा एक महिनादेखि महानिर्देशक पद खाली भएपछि प्रशासनिकबाहेकका काम ठप्प बन्न पुगेका छन् ।

विभागमा जानका लागि सहसचिवहरुको दाैडधुपका कारण महानिर्देशक पठाउन असहज स्थिति सिर्जना भएको बताइन्छ ।

प्रधानमन्त्री कार्यालयले महानिर्देशक कसलई पठाउने भन्ने विषयमा निर्णय लिन नसक्दा विभागका नियमित काम समेत ठप्प बन्न पुगेका छन् । विभागले राजस्व अनुसन्धानमा देखाउनुपर्ने सक्रियता समेत देखाउन नसक्दा राज्यलाई ठूलो नोक्सानीको खतरा समेत बढेको छ । राजस्व छलीका सूचना समेत महानिर्देशक नभएका कारण आउन छोडेको विभागका एक कर्मचारीले न्यूज नेपाललाई भने ।

विभागका केहि निर्देशकहरु भने महानिर्देशक नभएको माैका छोपेर व्यापारीसंग विभिन्न होटेलहरुमा लेनदेन डिल गरिरहेको स्रोतको दाबी छ । राजस्वसम्बन्धिका विषयमा व्यापारीसंगको डिल चलिरहेको छ । महानिर्देशक जति समय ढिला गरेर पठाइ्छ, घुस डिल त्यति नै बढ्ने स्रोतको दाबी छ ।

‘प्रधानमन्त्री कार्यालयले नै महानिर्देशक पठाउनुपर्ने हो । सहसचिवहरुको चर्को लबिङ र शक्ति केन्द्रहरुको दाैडधुपका कारण संकट आइलागेको छ । यसले राजस्व विभागको काम, कर्तव्य र क्षेत्राधिकारमै संकुचनको खतरा छ ।’ विभागका एक कर्मचारीले न्यूज नेपालसंग भने ।

राजस्व विभागमा जानका लागि कृष्ण मैनाली, कोषहरि निराैला, तीर्थ चिलवाल, उदय राणा लगायतका सहसचिवहरुले चर्को दाैडधुप गरिरहेको बताइन्छ ।

मैनाली र चिलवाल भने राजस्व समूहका र राजस्वबारे राम्रो ज्ञान भएका सहसचिवहरु हुन् । तर, चर्को दाैडधुप चलेपनि मैनाली वा चिलवाललाई नै महनिर्देशक बनाउने तयारी चलिरहेको स्रोतको दाबी छ । निराैला काबिल प्रशासकको रुपमा चिनिन्छन भने उनीसंग राजस्वमा काम गरेको अनुभव भने नभएको बताइन्छ । यस्तै, महानिर्देशकका लागि राणा भने शक्ति केन्द्र धाउने अग्रस्थानमा रहेका छन् । उनी सरकारी कर्मचारीहरुको सूची पल्टाउदा समेत सबैभन्दा धेरै माैका पाउनेमा पर्छन् । उनी हङकङको महाबाणिज्यदूतदेखि झापा, रुपन्देही र काभ्रे गायतका जिल्लामा सीडीओ, पालुङटार नगरपालिकाको कार्यकारी र भन्सार विभागको प्रशासनो उपसचिवको रुपमा समेत काम गरिसकेका छन् । उनी प्रधानमन्त्रीका सल्लाहकार विष्णु रिमाल निकटका मानिन्छन् । रिमालकै जोडबलमा राजस्व अनुसन्धान विभागमा जान खोजिरहेको बताइन्छ ।

खरिदारबाट निजामती सेवा प्रवेश गरेकी कृष्णकुमारी श्रेष्ठलाई सरकारले कायममुकायमको जिम्मेवारी दिएपनि कार्यसम्पादन क्षमता अभावका कारण विभागको कार्य प्रगति ठप्प प्रायः देखिन्छ । लोकसेवामा अब्बल भएपनि श्रेष्ठको कार्यक्षमता भने निजामती सेवा प्रवेशकै स्थितिमा रहेको चर्चा समेत चल्ने गरेको छ।

Comments