नारायणकाजीविरुद्ध १९ वर्षीय युवा आयुषले हाले अदालतको अवहेलना मुद्दा

काठमाडौं । १९ वर्षीय युवा आयुष दाहालले नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठविरुद्ध अदालतको अवहेलना मुद्दा दर्ता गराएका छन् ।

कानूनका विद्यार्थी समेत रहेका मोरङका दाहालले राष्ट्रियसभा जस्तो बौद्धिक व्यक्तिहरुको सभामा रहेका नेताले अदालतको मान प्रतिष्ठामाथि आँच पुर्‍याउने गरि सार्वजनिक रुपमा अभिव्यक्ति दिएको भन्दै सर्वोच्चमा मुद्दा दर्ता गराएका हुन् ।

दाहालले सर्वोच्चमा श्रेष्ठविरुद्ध मुद्दा दर्ता गर्दै भनेका छन्, न्यायपालिकाको शुद्धिकरणमा ध्यान दिनुको सट्टा घुस नभई न्याय पाइन्न भन्नेजस्तो गैरसंवेदनशील विषयमा अभिव्यक्ति दिएर न्यायपालिकाको विश्वासमा गम्भीर प्रभाव पार्न खोज्नु लोकतन्त्रका लागि राम्रो होइन् । लोकतन्त्रको सुदृढीकरणका लागि पनि यस्ता विषयमा सचेत नागरिकको हैसियतले सर्वोच्च पुगेँ ।

यो पनि पढ्नुहोस्ः च्याँखे थाप्न नारायणकाजीले न्यायालयविरुद्ध फालेको जालः माछा पर्ला कि भ्यागुतो ?

दाहालले दायर गरेको मुद्दा असोज १९ गतेका लागि पेशी तोकिएको छ । नेता श्रेष्ठले सामाजिक सञ्जालमा केहिदिन पहिले सामाजिक सञ्जालमा न्यायको खोजीमा अदालत पुगेको कुनै पनि नेपालीले सम्पर्क, पहुँच वा घुस बिना न्याय पाउने अवस्था नरहेको भन्दै अदालत स्वार्थ, बदला र प्रतिशोध पुरा गर्ने साधन बन्न पुगेको आरोप लगाएका थिए ।

के लेखेका थिए नेता श्रेष्ठले ?

पछिल्लो समय अदालतमाथि अनेक आरोप लगाउने र न्याय किनबेच हुने गरेको आरोप लगाउदै अभिव्यक्ति दिनेक्रम बढेको छ । न्यायपालिकामाथिका यस्ता टिप्पणीले न्याय सम्पादनमा समेत प्रभाव पर्ने विज्ञहरुले बताउने गरेका छन् ।

न्यापालिकाले गर्ने गलत कामका लागि नेपाल बार, न्याय परिषद् र संसदले समेत उच्च निगरानी राख्ने भएकाले सार्वजनिक टिप्पणीले अदालतमाथि अनास्था फैलाउने टिप्पणी गर्न नहुनेमा जोड दिने गरिएको छ । यद्यपी यसअघि नेपाल बारका अध्यक्ष गोपालकृष्ण घिमिरेले समेत न्यायाधीशविरुद्ध गम्भीर टिप्पणी गरेपछि उनीविरुद्ध सर्वोच्चमा अवहेलना मुद्दा चलिरहेको छ ।

Comments