राति नै चाेरले चाेर्याे नाम्सी पुलको रेलिङ

बागमती प्रदेश

- न्यूज नेपाल

काठमाडौं । नारायणगढ–मुग्लिन सडकको नाम्सी पुलको रेलिङ चोरी भएको छ ।

भरतपुरको डिभिजन सडक कार्यालयका अनुसार सोमबार बिहान सडक अनुगमनमा जाँदा पुलको रेलिङ नै चोरि भएको हो । आइतबार राति रेलिङ चोरी भएको अनुमान छ ।

कार्यालयका सूचना अधिकारी इन्जिनियर कृष्ण आचार्यले हाल पुलमा सुरक्षाका लागि रातको समयमा पनि देखिने पाइपहरू राखेको बताए । नयाँ पुलको आडैमा रहेको पुरानो पुलको फलामका रेलिङ चोरी भएका हुन् ।

यसबारेमा चितवन जिल्ला प्रशासन कार्यालय र प्रहरी कार्यालयमा जानकारी गराई चोरी भएका सामान र चोरी गर्ने व्यक्तिको खोजी सुरू भएको पनि उनले बताए । नारायणगढदेखि झन्डै ३२ किलोमिटर पर मुग्लिनतर्फ कालीखोला नजिकै नाम्सी पुल छ ।

नारायढगढ–मुग्लिन सडक राजधानी काठमाडौं र पर्यटकीय सहर पोखरालाई जोड्ने मुख्य मार्ग हो । यो सडक हुँदै दैनिक १० हजारभन्दा बढी गाडी ओहोरदोहोर गर्छन् ।

दिनरात व्यस्त रहने सडकमा भएको चोरीलाई संवेदनशील रूपमा लिएको सूचना अधिकारी आचार्यले बताए । ‘दुर्घटना रोक्न राखिएका पूर्वाधारको चोरी सामान्य होइन गम्भीर अपराध हो । यसमा संलग्नको खोजी भइरहेको छ,’ आचार्यले भने ।