पूर्वराष्ट्रपति राजनीतिमा फर्किन नपाउने भन्ने संविधानमा लेखेकाे छैन्ः कांग्रेस सभापती देउवा

breaking news

- न्युज नेपाल

काठमाडाैं । नेपाली कांग्रेसका सभापति शेरबहादुर देउवाले पूर्वराष्ट्रपति र उपराष्ट्रपतिले राजनीतिमा फर्किन नपाउने भन्ने संविधानमा कुनै प्रावधान नरहेको बताएका छन्।

शनिबार विराटनगर विमानस्थलमा पत्रकारहरूसँग कुरा गर्दै उनले पूर्वराष्ट्रपति विद्यादेवी भण्डारी र पूर्वउपराष्ट्रपति नन्दबहादुर पुनको राजनीतिक सक्रियतालाई अस्वाभाविक भन्न नमिल्ने बताए।

“पूर्वराष्ट्रपति र उपराष्ट्रपतिले राजनीतिक दलमा आबद्ध हुन नपाउने भन्ने संविधानमा लेखिएको छैन,” देउवाले भने, “राजनीति गर्ने अधिकार सबै नागरिकलाई छ।”

पूर्वराष्ट्रपति भण्डारीको एमालेको साधारण सदस्यता नवीकरण नगर्ने निर्णय हालै एमालेको केन्द्रीय कमिटी बैठकले गरेको थियो। उता, पूर्वउपराष्ट्रपति पुन माओवादी केन्द्रमा फर्केर पार्टीको उपाध्यक्ष भइसकेका छन्।

त्यसैगरी, संविधान संशोधनबारे पत्रकारको प्रश्नमा देउवाले दुईतिहाइ बहुमत जुटे मात्र प्रक्रिया अघि बढ्ने स्पष्ट पारे। “दलहरूसँग छलफल त भइरहेको छ, तर अहिलेसम्म कुनै निष्कर्षमा पुगेका छैनौं,” उनले भने।

प्रधानमन्त्री केपी शर्मा ओली नेतृत्वको सरकारमा सहभागी रहेका नेपाली कांग्रेसका मन्त्रीहरूलाई फिर्ता बोलाउनेबारे कुनै औपचारिक छलफल नभएको देउवाले बताए। “त्यस्तो विषयमा पार्टीभित्र छलफल भएको छैन,” उनको भनाइ थियो।