नेपाली महावाणिज्यदूतद्वारा चिनियाँ नागरिकले सञ्चालन गरेको नेपाली रेष्टुरेन्ट उद्घाटन

ल्हासा, फागुन १२, २०८२ – तिब्बतको ल्हासास्थित १.९ कुजिलिन स्क्वायर, विन्हे पार्कमा ‘नेपाली रेष्टुरेन्ट’ सञ्चालनमा आएको छ। ल्हासा नेपाल क्याटरिंग म्यानेजमेन्ट कम्पनीद्वारा व्यवस्थापन गरिएको उक्त रेष्टुरेन्टको उद्घाटन महावाणिज्यदूत लक्ष्मीप्रसाद निरौला र प्रोपाइटर चिनियाँ नागरिक ल्होसोङ निगाले संयुक्त रूपमा गरेका हुन्।

उद्घाटन कार्यक्रममा सयौं स्थानीय बासिन्दाको उपस्थिति रहेको थियो। रेष्टुरेन्टलाई नेपाली परम्परागत शैलीमा सजावट गरिएको छ भने कार्यक्रममा सहभागी पाहुनाहरुलाई थकाली थाली सेटमार्फत स्वागत गरिएको थियो। कासका थाल, बटुका तथा काँटा–चम्चाको प्रयोग गरी नेपालीपन झल्काउने प्रयास गरिएको आयोजकले जनाएको छ।

कार्यक्रममा नेपाली तथा चिनियाँ कलाकारहरूले नेपाली र तिब्बती गीत तथा नृत्य प्रस्तुत गरेका थिए। रेष्टुरेन्टमा नेपाली कामदारहरूलाई रोजगारी दिइएको जानकारी पनि दिइयो।

उद्घाटन मन्तव्यका क्रममा महावाणिज्यदूत निरौलाले नेपाल र चीन, विशेषगरी तिब्बतसँग युगौँदेखि सरकारी मात्र नभई जनस्तरसम्म गहिरो सम्बन्ध रहेको उल्लेख गरे। नेपाली व्यवसायीहरूले लामो समयदेखि तिब्बतका विभिन्न स्थानमा व्यापार–व्यवसाय गर्दै आएको तथा ल्होसोङजस्ता चिनियाँ व्यवसायीहरू पनि नेपालमा व्यवसायमा संलग्न रहेको उनले बताए। यस्ता पहलले दुई देशबीचको सम्बन्ध थप सुदृढ हुने विश्वास व्यक्त गर्दै उनले ल्हासामा सञ्चालित नेपाली व्यवसाय र काठमाडौंमा सञ्चालनमा रहेका चिनियाँ रेष्टुरेन्टहरूबीचको सफल व्यापारिक गतिविधिले आपसी सम्बन्ध प्रगाढ बनाएको धारणा राखे। ल्हासा नेपाल क्याटरिंग म्यानेजमेन्ट कम्पनीद्वारा सञ्चालित यो रेष्टुरेन्ट पनि सफलतापूर्वक सञ्चालन हुने विश्वास उनले व्यक्त गरे।

प्रोपाइटर ल्होसोङ निगाले उद्घाटन गरिदिएकोमा महावाणिज्यदूत निरौला तथा उपस्थित महावाणिज्यदूतावास परिवार र स्थानीय नागरिकप्रति आभार व्यक्त गरे। उनले नेपाल–चीन सम्बन्ध अझ सुदृढ बनाउन यस्ता प्रयासहरू निरन्तर अघि बढाउने प्रतिबद्धता जनाउँदै रेष्टुरेन्टमार्फत प्रामाणिक नेपाली स्वाद पस्कने बताए।

उल्लेखनीय छ, ल्होसोङ निगाले ‘तारा रग्स उद्योग’का नाममा काठमाडौं महानगरपालिका–६, तीनचुलीमा विगत तीस वर्षदेखि गलैंचा उद्योग सञ्चालन गर्दै नेपालमा समेत व्यवसाय गर्दै आएका छन्।

Comments