म्यानचेस्टर सिटी र आर्सनलद्धारा प्रभावशाली जित, छनौट हुने सम्भावना कामयै

खेलकुद

काठमाडौं, ३१ बैशाख । इंग्लिस प्रिमियर लिग अन्तर्गत शनिबार राति भएका खेलमा जित निकाल्दै म्यानचेस्टर सिटी र आर्सनलले शीर्ष चारमा रहँदै आउँदो सिजन च्याम्पियन्स लिगका लागि छनौट हुने सम्भावना कामय राखेका छन् । लिग अन्तर्गत राति भएको खेलमा म्यानचेस्टर सिटीले साबिक विजेता लेस्टर सिटीलाई २–१ ले हराएको हो ।

म्यानचेस्टर सिटीको मैदानमा भएको खेलमा सिटीलाई जिताउन डेविड सिल्भा र गाब्रियल डी जिससले गोल गरे । लेस्टरका लागि शिन्जी ओकाजाकीले गोल गरे । अर्को खेलमा आर्सनलले स्टोक सिटीलाई ४–१ ले हरायो । आसर्नलको जितमा ओलिभर जिरउडले दुई तथा मेसुट ओजिल र एलेक्स सान्चेजले एक एक गोल गरे ।

स्टोक सिटीका लागि क्रोउचले एक गोल फर्काए । जितपछि तेस्रो स्थानमा उक्लिएको म्यानचेस्टर सिटीको लिगका दुई खेल बाँकी हुँदा ७२ अंक भएको छ । चौंथो स्थानको लिभरपुलको ७० अंक छ । पाँचौं स्थानमा रहेको आर्सनलको ६९ अंक भएको छ । राति भएका अरु खेलमा बोर्नमाउथले बर्नली तथा साउथह्याम्पटनले मिडल्सबर्गलाई समान २–१ तथा स्वान्सी सिटीले सन्डरल्याण्डलाई २–० ले हरायो ।