भक्तपुरकी किन्जेल श्रेष्ठले दुबईमा कराँतेको उपाधि जितिन

खेलकुद

भक्तपुर, १७ भक्तपुर । भक्तपुरको मध्यपुर थिमि निवासी ‘सानी चेली’ किन्जेल श्रेष्ठले दुबईमा कराँतेको उपाधि जितेकी छन् । युएईको दुबईमा सम्पन्न बुडोकान कराँते २०१७ को उपाधि जितेर श्रेष्ठले देशको शान उच्च बनाएकी हुन् ।

मध्यपुर थिमि नगरपालिका वडा ४ दथुटोल निवासी प्रेम श्रेष्ठकी छोरी किन्जेलले ३० केजी तौल समूहको कराँतेमा प्रथम तथा काता प्रदर्शनमा तृतीय स्थान हासिल गरेकी हुन् । विगत केहि समयदेखि उतै बस्दै आएका उनीहरुले खेलकुद क्षेत्रमा काम गर्दै आएका छन् ।

वैदेशिक रोजगारीको सिलसिलमा सीमित समयको लागि विदेशिएका उनीहरुको दैनिकी खेलकुदमा नै बित्ने गरेको छ । प्रतियोगितामा अन्य ११ जना नेपाली खेलाडीहरुको पनि सहभागिता रहेको थियो । ती खेलाडीहरुले पनि विभिन्न विधामा पदक तथा कप जितेका छन् ।

प्रतियोगितामा यूएई कराँते एण्ड तेक्वान्दो क्लबले नेपाल कराँते संघको स्वीकृतिमा नेपाली खेलाडीहरु सहभागि गराएका थिए । कराँते प्रतियोगिता जेठ १३ गते शनिबार संयुक्त अरब ईमरेट्स युएईको दुबईमा भएको थियो ।