सशस्त्र प्रहरी प्रधानमन्त्री कप क्रिकेटको सेमिफाइनलमा

खेलकुद

काठमाडौं, १९ जेठ । सशस्त्र प्रहरी बल (एपीएफ) प्रधानमन्त्री कप एक दिवसीय राष्ट्रिय क्रिकेट प्रतियोगिताको सेमिफाइनलमा प्रवेश गरेको छ । कीर्तिपुर मैदानमा शुक्रबार भएको खेलमा मध्यपश्चिमाञ्चललाई ५ विकेटले हराउँदै सशस्त्र सेमिफाइनल प्रवेश गरेको हो । टस हारेर पहिले ब्याटिङ गरेको मध्यपश्चिमले निर्धारित ५० ओभरमा ८ विकेट गुमाएर १ सय ८१ रन बनाएको थियो ।

मध्यपश्चिमका अनुपम सिंहले ५६ रन तथा राजवीर सिंहले ३७ रन जोडे । बलिङतर्फ सशस्त्रका भुवन कार्कीले ३ विकेट लिए । जवाफमा १ सय ८२ रनको लक्ष्य सशस्त्रले २८ ओभर २ बलमा ५ विकेट गुमाएर पूरा गर्‍यो । सशस्त्रका सन्दीप सुनारले ८७ रन जोड्दा आसिफ शेखले ४० रनको योगदान दिए ।

जितसँगै सशस्त्रले समूहमा अन्तिम खेल खेल्न बाँकी छँदै सेमिफाइनलमा स्थान पक्का गरेको हो । यो समूहबाट पश्चिमाञ्चल पनि सेमिफाइनलमा पुगिसकेको छ । समूह ‘बी’बाट दुई विभागीय टोलीहरु नेपाल पुलिस क्लब र त्रिभुवन आर्मी क्लब यसअघि नै सेमिफाइनलमा पुगिसकेका छन् ।