रोनाल्डोको दुई गोलको मदतमा च्याम्पियन्स लिगको उपाधि रियल मड्रिडको कब्जामा

खेलकुद

काठमाडौं, २१ जेठ । रियल मड्रिडले च्याम्पियन्स लिगको उपाधि जितेको छ । क्रिष्टियानो रोनाल्डोको दुई गोलको मदतमा रियल मड्रिडले च्याम्पियन्स लिगको उपाधि जितेको हो । यससँगै रियल लगातार दुई सिजन च्याम्पियन्स लिगको उपाधि जित्ने पहिलो क्लब समेत बनेको छ । साथै रियलको यो १२ औं कीर्तिमानी उपाधि समेत हो ।

शनिबार राति भएको फाइनलमा रियल मड्रिडले इटालियन च्याम्पियन युभेन्टसलाई ४-१ गोल अन्तरले हराएको छ । कार्डिफमा भएको खेलमा रियलले २० औं मिनेटमा रोनाल्डोको गोलबाट अग्रता लिएको थियो । २७ औं मिनेटमा युभेन्टसका मारियो मान्जुकिजले बराबरी गोल फर्काए र पहिलो हाफ १-१ को बराबरीमा सकियो ।

तर, दोस्रो हाफमा युभेन्टसले रियल मड्रिडलाई रोक्न सकेन । ६१ औं मिनेटमा कासिमेरोले गोल गर्दै टिमलाई २-१ अग्रता दिलाए भने तीन मिनेटपछि नै रोनाल्डोले दोस्रो गोल गरे । र, रियल ३-१ ले अगाडि रहृयो ।

खेलको ८४ औं मिनेटमा युभेन्टसलाई अर्को झड्का लाग्यो । उसका जुआन रातो कार्ड खाँदै मैदानबाट बाहिरिए र युभेन्टस १० खेलाडीमा सिमित भयो । ९० औं मिनेटमा एसेन्सिओले गोल गरेपछि रियल मड्रिड ४-१ ले विजयी भएको छ ।