नेपाल पुलिस क्लब प्रधानमन्त्री कप क्रिकेटको फाइनलमा प्रवेश

खेलकुद

काठमाडौं, २२ जेठ । नेपाल पुलिस क्लब काठमाडौंमा जारी प्रधानमन्त्री कप एक दिवसीय राष्ट्रिय क्रिकेट प्रतियोगिताको फाइनलमा प्रवेश गरेको छ । त्रिवि क्रिकेट मैदान कीर्तिपुरमा सोमबार भएको पहिलो सेमिफाइनलमा सशस्त्र प्रहरीमाथि ३४ रनको जित हासिल गर्दै पुलिस फाइनल प्रवेश गरेको हो । पहिले ब्याटिङ गरेको पुलिसले ९ विकेटको क्षतिमा २ सय ५२ रन बनाएको थियो ।

पुलिसका लागी कुशल भुर्तेलले ५२ तथा सिद्धान्त लोहनीले ४० रन बनाएको इनिङमा दीपेन्द्रसिंह ऐरीले ३७ रनको योगदान दिए । सशस्त्र प्रहरीका अनिल शाहले ३ तथा ज्ञानेन्द्र मल्ल र अरुण ऐरीले २–२ विकेट लिए ।

वर्षाले प्रभावित खेलमा ‘डकवर्थ लुईस’ नियमअनुसार २८ ओभर ३ बलमा १ सय ७३ रनको चुनौती पाएको सशस्त्रले ६ विकेटको क्षतिमा १ सय ३८ रनमात्र बनाउन सकेपछि पुलिसले ३४ रनको जित हासिल गरेको हो । सशस्त्रका कप्तान ज्ञानेन्द्रले अलराउन्ड प्रदर्शन गर्नेक्रममा ३५ बलमा ४५ रन जोडे पनि टिमलाई जिताउन सकेनन् ।

दोस्रो सेमिफाइनलमा मंगलबार त्रिभुवन आर्मी क्लब र पश्चिमाञ्चल विकास क्षेत्र भिड्नेछन् । आर्मी समूहको विजेता हो भने पश्चिमाञ्चल अर्को समूहको उपविजेता हो ।