आज नेपाल र भारतबीचको मैत्रीपूर्ण फुटबल खेल हुँदै

खेलकुद

काठमाडौं, २३ जेठ । नेपाल र भारतबीच आज मैत्रीपूर्ण फुटबल खेल हुँदैछ । एएफसी एसियन कप क्वालिफायरको तयारीमा रहेको नेपाल र भारतका राष्ट्रिय फुटबल टोलीबीच आज साँझ मुम्बईमा मैत्रीपूर्ण फुटबल हुन लागेको हो । मुम्बईको अंधेरी स्पोर्टस् कम्प्लेक्समा नेपाली समयअनुसार साँझ सवा सातबजेदेखि दुई टोलीबीचको खेल सुरु हुनेछ ।

मुम्बईमा सोमबार आयोजित प्रिम्याच कन्फ्रेन्समा नेपाली प्रशिक्षक ग्योतोकु कोजीले भारतसँग हुने मैत्रीपूर्ण खेल कठिन तर महत्वपूर्ण भनेका छन् । ‘यो खेल एफसी क्वालिफायर्सका लागि तयारी हो । भारतसँगको खेल हाम्रो लागि महत्वपूर्ण छ । खेल कठिन र महत्वपूर्ण छ ।’ कोजीले भने ।

यता भारतीय प्रशिक्षक स्टेफन कनस्नटाइनले नेपालसँगको खेल सधैं प्रतिस्पर्धात्मक हुने बताए । ‘हामी राम्रो खेलको प्रतीक्षामा छौं र आशा छ हामी खेल जित्नेछौं ।’ उनले भने । उनले किर्गिस्तानविरुद्ध हुने एसियन कप क्वालिफायर्सका लागि नेपालसँगको खेल महत्वपूर्ण भएको बताए ।

भारत अहिले फिफा वरीयतामा सयौं स्थानमा छ । यसअघि भारतले लेवनानसँग मैत्रीपूर्ण खेल खेल्ने तय भएपनि लेवनानले आन्तरिक कारण नखेल्ने बताएपछि भारत फुटबल संघले नेपाललाई प्रस्ताव राखेको थियो ।

नेपालले यही जेठ ३० गते एसियन कप क्वालिफायर्स अन्तर्गत घरेलु मैदानमा यमनसँग खेल्दैछ । त्यही दिन भारतले पनि कीर्गिस्तानसँग खेल्दैछ । भारतले आफ्नो समूहको पहिलो खेल जितेको थियो भने नेपाल फिलिपिन्ससँग पराजित भएको थियो ।