जर्मनीद्धारा क्यामरुन ३–१ ले पराजित, फिफा कनफेडेरेशन कपको सेमिफाइनलमा प्रवेश

खेलकुद

काठमाडौं, १२ असार । जर्मनी फिफा कनफेडेरेशन कप फुटबलको सेमिफाइनलमा प्रवेश गरेको छ । रुसमा भइरहेको प्रतियोगिता अन्तर्गत आइतबार राति भएको समूह ‘बी’ को आफ्नो अन्तिम खेलमा जित निकाल्दै विश्व विजेता जर्मनीले समूह विजेताको रुपमा अन्तिम चारमा प्रवेश गरेको हो ।

जर्मनीले क्यामरुनलाई ३–१ ले हराएको हो । जर्मनीको जितमा टिमो वेर्नेरले दुई तथा केरेम डेमिरबेले एक गोल गरे । क्यामरुनका लागि विन्सेन्ट अबुबाकरले एक गोल फर्काए । पहिलो हाफमा गोल गर्न नसकेको जर्मनीका लागि ४८ औं मिनेटमा डेमिरबेले पहिलो गोल गरे । ६६ औं मिनेटमा वेर्नेरले गोल गर्दै जर्मनीको अग्रता दोब्बर पारे ।

७८ औं मिनेटमा अबुबाकरले क्यामरुनका लागि एक गोल फर्काए । तर त्यसको तीन मिनेटपछि वेर्नेरले व्यक्तिगत दोस्रो गोल गरेपछि जर्मनी ३–१ ले विजयी भयो । जितपछि तीन खेलबाट सात अंक जोडेको जर्मनी समूह विजेता बन्दै सेमिफाइनलमा पुग्न सफल भयो ।

तीन खेलबाट एक अंक मात्रै जोडेको क्यामरुन भने प्रतियोगिताबाट बाहिरिएको छ । जर्मनीले फाइनल प्रवेशका लागि समूह ‘ए’ को उपविजेताको रुपमा अन्तिम चारमा आएको मेक्सिकोसँग प्रतिस्पर्धा गर्ने छ । यी दुवै बिचको खेल बिहीबार सोचीमा हुनेछ ।