गोरेसहित भुजुङ र डा. डेबिटलाई केन्द्रीय कारागार लगियो

बागमती प्रदेश

काठमाडौं २९, जेष्ठ । ३८ क्वीन्टल सुन तस्करी र सनम शाक्यको हत्या अभियोगमा पूर्पक्षका लागि जेलमा रहेका चूडामणि उप्रेती ‘गोरे’, छिरिङ वाङ्देल गुरुङ र भुजुङ गुरुङलाई मोरङबाट काठमाडौं ल्याइएको छ ।

उनीहरु तीनैजनालाई सम्पत्ति शुद्धीकरणमा अनुसन्धान गर्न काठमाडौं ल्याइएको हो । यसअघि उनीहरुलाई मोरङ जिल्ला अदालतको आदेशअनुसार पुर्पक्षका लागि जेल चलान गरिएको थियो ।

उनीहरुमाथि सम्पत्ति शुुद्धीकरण विभागले अकूत सम्पत्ति कमाएको आरोपमा अनुसन्धान गर्नेछ । आजै उनीहरुलाई सम्पत्ति शुद्धीकरण विभागमा उपस्थित गराएर केन्द्रीय कारागार लगिएको बताइएको छ ।

पूर्पक्षका लागि जेल चलान भएकाहरु अभियुक्तमाथि अनुसन्धान गर्न नमिल्ने भएपछि सम्पत्ति शुद्धीकरणमा उनीहरुमाथि अनुसन्धान हुन लागेको हो । काठमाडौं ल्याएकै अवस्थामा उनीहरुमाथि गृहको विशेष अनुसन्धान समितिले पनि थप अनुसन्धान गर्ने बताइएको छ । गृहको टोलीले गोरे, भुजुङ र छिरिङलाई सँगै राखेर अनुसन्धान गर्ने योजना बनाएको छ ।