डा. गोविन्द केसी फेरि अनसन बस्ने , शुक्रबार दिउँसो २ बजे त्रिवि शिक्षणा अस्पतालमा पत्रकार सम्मेलन

बागमती प्रदेश

काठमाडौं १२, असोज। सरकारले यसअघि आफुसँग गरेको सहमति कार्यान्वयन नगरेको भन्दै डा. गोविन्द केसीले चिकित्सा शिक्षा विधेयकका बारेमा पत्रकार सम्मेलन गर्ने भएका छन् ।

सहमति कार्यान्वयन नगरे कार्तिक १६ गतेदेखि १६ औँ अनसन बस्ने चेतावनी दिएका डा. केसीले शुक्रबार दिउँसो २ बजे त्रिवि शिक्षणा अस्पतालमा पत्रकार सम्मेलन गरेर चिकित्सा शिक्षा विधेयकका बारेमा सरकारले आफूसँग गरेको सहमतिका बारेमा जानकारी दिन लागेको केसीका सहयोगिहरुले जनाएका छन् ।

डा. केसीले यसअघि नै सरकार र आफूबीचको पूर्व सम्झौताअनुसार चिकित्सा शिक्षा विधेयक जारी नभए आगामी कात्तिक १६ गतेदेखि १६ औं अनशन थाल्ने चेतावनी दिएका थिए ।

डा. केसीको मागअनुसार विधेयक निर्माण गरी संसदमा प्रस्तुत गर्ने सरकारसँगको लिखित सहमतिपछि उनले आफ्नो १५ औं अनसन गत साउन १० गते तोडेका थिए । तर, संसदले उक्त विधेयक पास गरेको छैन ।
१५ औं पटक २७ दिन अनसन बसेका केसी र सरकारबीच नौ बुँद सहमतिपछि उनी अनसन तोड्न सहमत भएका थिए ।

डा. केसीले १५ औं अनसन जुम्लाबाट सुरु गरेका थिए । कर्णाली स्वास्थ्य विज्ञान प्रतिष्ठानमा अनसनरत केसीलाई अनसनको २० औं दिनमा सेनाको हेलिकोप्टरबाट सरकारले काठमाडौं ल्याएको थियो ।