नेपाली कामदारको जापान जाने बाटो खुल्यो, प्रकृया यस्तो हुनेछ

काठमाडौं ।

नेपाल र जापान सरकारबीच कामदार आपूर्तिबारे ‘सहकार्यको समझदारी’ (एमओसी) मा सोमबार हस्तक्षर भएको छ । समझदारीपछि नेपालबाट जापानमा कामदार पठाउने प्रक्रिया थालनी गर्ने बाटो खुलेको छ । यसका लागि जापान पठाउन श्रम मन्त्रालय अन्तरगत छुट्टै इकाई खडा हुनेछ ।

कामदार आपूर्तिका लागि सरकारीस्तरबाटै संयन्त्र खडा गरेर जापानमा दुबै देश सहमत भएका हुन् । अब म्यानपावर व्यवसायी जापानमा कामदार पठाउने प्रक्रियाबाट अलग हुनेछन् । नेपाल र जापान सरकारले कोरियाको जस्तै छुट्टै संयन्त्र बनाएर कामदार छनोट गरी पठाउने व्यवस्था गर्नेछन् ।

दुबै पक्ष कामदार लैजाने विधि, प्रक्रिया, कामदारको सेवा, सुविधा, सुरक्षा लगायतका विषयमा टुंगोमा पुगेका हुन् । लागतको विषय भने समझदारीपछि दुई देशबीचको प्राविधिक संयन्त्रले टुंगो लगाउने छ ।

अब अप्रिल महिनाबाटै कामदार लैजाने प्रक्रियाका लागि तयारी सुरु हुनेछ । समझदारी भएपछि भाषा परीक्षा र सिप परीक्षण, कामदार छनोट प्रक्रियाको सुरु गरिने छ ।

कामदार संकट गहिरिएपछि जापान सरकारले विदेशी कामदार भित्र्याउने नीति लिएको छ । नेपालसँगै चीन, इन्डोनेसिया, मंगोलिया, म्यानमार, थाइल्यान्ड, फिलिपिन्स र भियतनामबाट कामदार लिने योजना बनाएको छ ।

सहमतिअनुसार जापान जाने विशेष सीप भएका श्रमिक (एसएसडब्लु)लाई दुई वर्गमा विभाजन गरिनेछ। पहिलो वर्ग एसएसडब्लु-१ वर्गका श्रमिकहरु अनुभवी हुनुपर्ने छ। पहिलो वर्गका श्रमिकहरु पाँच वर्ष जापान बस्न पाउने छन्।

दोस्रो वर्ग एसएसडब्लु-२ का कामदारका लागि भने उच्च तहको सीप आवश्यक हुनेछ। उनीहरु पाँच वर्ष पछि पनि कार्यावधि थप गरी जापान बस्न पाउने छन्। यो वर्गका श्रमिकले आफ्ना परिवारका सदस्यहरुलाई पनि जापान लैजान सक्ने छन्।

यसरी जापान जाने नेपाली कामदारले जापानी कामदारले पाउने पारिश्रमिक सरह वा सो भन्दा बढी पारिश्रमिक पाउने समझदारीपत्रमा उल्लेख छ।

नेपाली कामदार जापान पठाउन जापानी भाषा परीक्षा एवं सीप परीक्षणका लागि छुट्टै इकाइसमेत गठन हुने छ। ‘यसका लागि जापानी पक्षलाई सहयोग एवं सहजीकरणका लागि वैदेशिक रोजगार विभाग अन्तर्गत एउटा छुट्टै इकाई स्थापना गरिने व्यवस्था गरिएको छ,’ श्रम मन्त्रालयका प्रवक्ता डा नारायण प्रसाद रेग्मीले भने, ‘समझदारीपत्रको प्रभावकारी कार्यान्यनको लागि दुवै देशका प्रतिनिधिहरु रहने गरी संयुक्त कमिटी गठन हुने छ। समितिले एसएसडब्लु अन्तर्गत नेपाली श्रमिकहरुको भर्ना, रोजगारी र स्वदेश फिर्ता लगायतका विषयमा अबलम्बन गर्ने विधि एवं प्रक्रियाको टुंगो लगाउने छ।’

सन् २०१९ को अप्रिल १ देखि जापानले कृषि नर्सिङ सवारी साधन निर्माण उद्योगलगायतका १४ बटा क्षेत्रमा कामदार आयात गर्ने तयारी गरेको छ।

Comments