नेकपा स्थायी समिति बैठकको सूचना आयो, एजेण्डा आएन

राजनीति

- न्युज-नेपाल

काठमाडाैँ । सत्तारुढ दल नेकपाको स्थायी कमिटी बैठक बुधबार बस्ने भनिएपनि हालसम्म एजेन्डा तय हुन सकेको छैन।

यसअघि पनि दुई पटक मिति तोकिएर स्थायी समिति बैठक स्थगित गरिएको थियो। त्यसबेला पनि दुई अध्यक्षहरुबीच एजेन्डा र राजनीतिक प्रतिवेदनको विषयवस्तुमा सहमति जुट्न सकेको थिएन।

कोरोनाको महामारी र लकडाउनको कारण बैठक स्थगित गर्नुपरेको भनिएपनि प्रमुख कारण एजेन्डा र राजनीतिक प्रतिवदेनमा सहमति जुट्न सकेको थिएन।

नेकपाका प्रवक्ता नारायणकाजी श्रेष्ठले सोमबार साँझसम्म पनि एजेन्डाबारे कुनै जानकारी नभएको बताए।

‘बुधबार बैठक बस्ने भनेर सूचनाबाहेक अरु केही जानकारी आएको छैन। एजेन्डाहरु पनि पठाउनु भएको छैन। दुवै अध्यक्षहरुबीच केही कुराकानी भएको भए जानकारी भएन,’ श्रेष्ठले भने, ‘सचिवालय वा अध्यक्षहरुले एजेन्डा पठाउने मात्रै हो स्थायी कमिटीले आफ्नो एजेन्डा तय गरेर छलफल गर्ने छ।’

पार्टी विधानमा कम्तीमा एक सातामा एक पटक सचिवालय बैठक बस्ने भने पनि जेठ १७ यता सचिवालयको बैठक बस्न सकेको छैन।

केन्द्रीय कार्यालयले बुधबार ११ बजे प्रधानमन्त्री निवास बालुवाटारमा बैठक बस्ने जानकारी स्थायी कमिटीका सदस्यहरुलाई जानकारी गराएको छ। यसअघि पनि दुई पटक अन्तिम समय आएर बैठक स्थगन गरिएको जानकारी दिइएको थियो।

अध्यक्ष तथा प्रधानमन्त्री केपी शर्मा ओलीले सहमति गर्ने तर त्यसका कार्यान्वयन नगर्ने आरोप अर्का अध्यक्ष पुष्पकमल दाहाल प्रचण्ड र नेता माधवकुमार नेपालले लगाउँदै आएका छन्। त्यसैले नेकपाको एउटा ठूलो हिस्सा ओलीसँग असन्तुष्ट छ। बुधबारको बैठकमा असन्तुष्ट पक्षले भने ‘एक व्यक्ति, एक पद’को पुरानै एजेन्डा उठाउने तयारी गरेको छ।

‘पुरानै एजेन्डाहरुलाई उठाउने छौं,’ स्थायी कमिटीका सदस्य वेदुराम भुसालले नेपालखबरसँग भने, ‘एक व्यक्ति एक पदका विषयलाई उठाउने छौं।’

त्यसैगरी सरकारको कामको बारेमा समीक्षा, कोरोना नियन्त्रणको क्रममा सरकारबाट भएको कमीकमजोरी, अमेरिकासँग भएको सहयोग सम्बन्धी सम्झौता मिलेनियम च्यालेन्ज कम्प्याक्ट(एमसीसी) आदिका विषयमा छलफल हुने छन्।

प्रधानमन्त्री ओलीमाथि बैठक छलेको आरोप लाग्दै आएको छ। अध्यक्ष प्रचण्ड र नेता नेपाल एकै स्थानमा हुँदा प्रधानमन्त्री ओली सचिवालयदेखि सबै कमिटीमा अल्पमत छन्।

‘पार्टीमा तीन पक्ष छ र दुई पक्ष एकै स्थानमा हुँदा प्रधानमन्त्री डिफेन्सिभ हुनु भएको छ। त्यसैले बहुमत पुर्‍याउने खोज्नु भएको छ। दुई पक्ष एकातिर हुँदा त्यो सम्भव नै देखिँदैन,’ एक स्थायी कमिटीको सदस्यले भने, ‘सहमति गर्ने तर त्यसको कार्यान्वयन नगर्ने गर्नाले प्रधानमन्त्री संकटमा पर्नु भएको छ।’

पछिल्लो समयमा आफूसँग भेट्न आउने नेताहरुलाई नेता नेपालले आफू र प्रचण्ड एकै स्थानमा रहेको र प्रधानमन्त्रीका कार्यशैली, सरकार र पार्टी सञ्चालनको प्रक्रिया सच्याउनु पर्ने बताउने गरेका छन्।

‘बैशाख २० गते सचिवालय बैठकमा उहाँ(प्रधानमन्त्री)ले आत्मआलोचना गर्दै आफूले पार्टी र सरकार सञ्चालन गर्ने बताउनु भएको थियो। तर पछिल्लो गतिविधिहरुले त्यस्तो देखाउँदैन,’ नेपाललाई उद्धृत गर्दै एक नेताले भने, ‘यो विषयमा प्रचण्ड र म एकै स्थानमा छौं।’

तर बालुवाटर पनि सके बहुमत पुर्‍याउने र नसके आलोचना कम गराउन सक्रिय बनेको छ। त्यसैको प्रयासस्वरुप ओली निकटस्थ नेताहरुले पूर्वमाओवादी नजिकका स्थायी कमिटीका सदस्यहरुसँग भेटघाटलाई तीव्र बनाएका छन्।

‘हिजो(आइतबार) पनि प्रधानमन्त्री सल्लाहकार र पूर्व माओवादीतर्फका स्थायी कमिटीका सदस्यहरु छलफल भएको थियो,’ ओली निकट एक नेताले भने।

स्थायी कमिटीको बैठकमा मिति तय भएपछि प्रदेश नम्बर पाँचका मुख्यमन्त्री शंकर पोखरेलले अध्यक्ष दाहालसँग उनकै निवास पुगेर भेट गरेका थिए। शुक्रबार भएको भेटमा दुवै अध्यक्ष मिलेर जानुपर्नेमा पोखरेलले जोड दिएका थिए।