सभापति देउवाले बोलाए आकस्मिक केन्द्रीय समिति बैठक

काठमाडौं । प्रमुख प्रतिपक्षी दल नेपाली कांग्रेसका सभापति शेरबहादुर देउवाले आकस्मिक केन्द्रीय समितिको बैठक बोलाएका छन्।

शुक्रबार साँझ प्रधानमन्त्री केपी ओलीसँग संवैधानिक निकायमा नियुक्तिबारे छलफल गरेर फर्किएका देउवाले शनिबार बिहान १० बजे केन्द्रीय समिति बैठक आह्वान गरेका हुन्। बैठक पार्टी कार्यलयमा बस्नेछ।

‘हिजो सभापतिज्युले संवैधानिक निकायका नियुक्तिको पाटो अब सल्टाउनुपर्‍यो भनेर बोलाउनु भएको थियो,’ कांग्रेस केन्द्रीय सदस्य रमेश लेखकले भने, ‘हामीले पनि यस विषयमा पटक-पटक दबाब दिइरहेकोले यसपटक भने टुङ्ग्याउनै पर्छ भन्यौँ।’

छलफलमा प्रधानमन्त्री ओलीले पार्टीमा विवाद चर्किएकाले पार्टी भित्रैबाट असहयोग हुने भन्दै देउवालाई सहयोग गर्न आग्रह गरेको देउवाको सचिवालयले जनाएको छ।

‘नेकपाभित्रको विवादका कारण संवैधानिक निकायमा नियुक्तिका विषयमा असहयोग हुने भन्दै सहयोग गर्न सभापति ज्यूलाई प्रधानमन्त्रीले आग्रह गर्नुभयो,’ देउवाको सचिवालयले भनेको छ, ‘प्रधानमन्त्रीले सहयोग गर्न भनेपछि सभापतिज्युले यस विषयमा पार्टीमा छलफल गरेर निर्णय दिउँला भनेर निस्किनु भएको हो।’

प्रधानमन्त्री ओलीले नेकपाकै कार्यकारी अध्यक्ष प्रचण्डसँग परामर्श नगरी भोली आइतबार बिहान ९ बजेको लागि संवैधानिक परिषदको बैठक बोलाएका छन्। देउवाले शुक्रबार साँझ प्रधानमन्त्रीसँगको भेटमा भोलि शनिबार नै केन्द्रीय समितिको बैठक राखेर केही निर्णय सुनाउने प्रतिवद्धता गरेका थिए।

यता नेपाली कांग्रेस केन्द्रीय कार्यालयका मुख्यसचिव कृष्णप्रसाद पौडेलले भने पार्टीका पूर्व केन्द्रीय सदस्य श्यामलाल श्रेष्ठको निधनको शोक प्रस्ताव पेश गर्नका लागि आकस्मिक बैठक बस्न लागेको जानकारी दिए।

Comments