‘सरकार बनाउने र ढाल्ने काम संसदको हो’: वरिष्ठ अधिवक्ता मैनाली

काठमाडाैँ । सर्वाेच्च अदालतकाे संवैधानिक इजलासमा एमिकस क्युरीका तर्फबाट राय दिँदै वरिष्ठ अधिवक्ता विजयकान्त मैनालीले सरकार बनाउने र ढाल्ने काम संसदको भएकाे बताएका छन् ।

प्रतिनिधिसभा विघटनसम्बन्धी मुद्दाकाे सुनुवाइमा आफ्ना सुझाव राख्दै मैनालीले भने, ‘संविधानको अधिकार संसदमा हुन्छ । राजनीतिक अधिकार कार्यकारीमा हुन्छ । संविधानले दिएकाे अधिकार संसद्ले प्रयोग गर्दा त्यो जनताले प्रयोग गरेकाे मानिन्छ । त्यसैले सरकार र कार्यकारीको अधिकार सीमित बनाइएको हुन्छ । सरकार बनाउने, गिराउने काम संसदको हो ।’

त्यसपछि इजलासका न्यायाधीश अनिलकुमार सिन्हाले वरिष्ठ अधिवक्ता मैनालीलाई प्रश्न गरे, दुई वटा संविधानसभा बन्याे, त्यहाँबाट संविधान जारी भयो । ती संविधानसभाका छलफलमा पार्टीको आन्तरिक द्वन्द्वका कारण पनि संसद् विघटन गर्न पाउनेबारे छलफल भएकाे थियो त ?’

मैनालीले छलफल भएकाे जवाफ दिए ।

सिन्हाले अर्काे प्रश्न गरे, ‘त्यसमा सहमति नै भएकाे छैन भने, त्यसलाई विधायिकाकाे अन्तर्निहित उद्देश्य मान्ने हो भने, यो संविधान कहाँ गएर टुंगिएला ?’

मैनालीले भने, ‘संसदीय प्रणालीमा पार्टी र संसद्लाई अनुशासनमा राख्नका लागि विघटन गर्न पाइन्छ ।’

एमिकस क्युरीलाई अदालतको सहयाेगी मानिन्छ । कुनै विशेष मुद्दामा विज्ञको राय लिन अदालतले आवश्यक ठानेमा एमिकस क्युरी बोलाउन सक्छ ।

एमिकस क्युरीले सम्बन्धित मुद्दाको पक्ष या विपक्षमा नलागी स्वतन्त्र र निस्पक्ष ढंगले आफ्नो राय दिन्छ भन्ने विश्वास गरिन्छ । मुद्दाका पक्ष या विपक्षले आफ्नो पक्षको तर्फबाट बहस गर्छन् । तर, एमिकस क्युरीले भने स्वतन्त्रतापूर्वक आफ्नो राय राख्छ ।

Comments