‘तराई-मधेसलाई मरुभूमिकरण गर्ने योजना स्वीकार्य छैन’: उपेन्द्र यादव

काठमाडौं । जनता समाजवादी पार्टी (जसपा) अध्यक्ष उपेन्द्र यादवले व्यापार घाटाको नाममा ढुंगा गिटी, बालुवा निकासी गर्ने बजेटको घोषणा राष्ट्रघाती भएको बताएका छन्।

बुधबार बजेटमा प्रस्तुत भएको व्यापार घाटा कम गर्ने सरकारको योजनामाथि टिप्पणी गर्दै यादवले यो राष्ट्रघाती भएको बताएका हुन्।

‘व्यापार घाटा कम गर्ने नाममा ढुंगा, गिटी, बालुवा निकासी गर्ने बजेटको घोषणा राष्ट्रघाती रहेको छ’, यादवले भने, ‘यसले चुरे विनास गर्ने, तराई/मधेसलाई मरुभूमिकरण गर्ने निश्चित नै छ।’

यादवले सरकारको नीति, कार्यक्रम र योजना वातावरणीय हिसाबले घातक रहेको बताए। उनले नवधनाढ्यदेखि व्यवसायीलाई फाइदा पुगे पनि यो घोषणाले चुरेको संवेदनशील क्षेत्रमा असर पर्ने र तराई मधेसमा ठूलो प्राकृतिक संकट आउने बताएका छन्।

‘यसबाट सबैभन्दा बढी प्रभाव चुरेको संवेदनशील क्षेत्रमा नै पर्ने र त्यसले तराई/मधेसमा ठूलो प्राकृतिक संकट आउने छ’, उनले थप भनेका छन्, ‘यसले नकारात्मक पर्यावरणीय असर पार्ने छ। जसको मूल्य तराई/मधेसमा बसोवास गर्ने जनताले चुकाउनु पर्ने छ।’

यो सरकारको निर्णयले भविष्यमा मधेसका भूमिको उर्वरता समाप्त हुने उनको भनाइ छ। तत्काल चुरे संरक्षणको पहल नभए जीवन रक्षाका लागि जनताले संघर्ष गर्नुपर्ने बताएका छन्।

‘भविष्यमा मधेसका भूमिको उर्वरता समाप्त भएर जनताको जीवन नै संकटमा पर्ने भएको हुँदा भरपर्दो वैज्ञानिक, पर्यावरणीय तथा वातावरणीय अध्ययन नगरी ल्याइएको ढुङ्गा, गिटी, बालुवा आदि उत्खनन् गरी निर्यात गर्ने कार्य बन्द गरिनु पर्छ’, यादवले भने, ‘अन्यथा वन विनाश, वातावरणीय सन्तुलन, जैविक विविधताको संरक्षण, चुरे संरक्षण र तराई/मधेसलाई मरुभूमिकरण हुने कार्यबाट जोगाउन र त्यहाँका जनताले आफ्नो जीवन रक्षाका लागि संघर्ष गर्न बाध्य हुनु पर्नेछ।’

Comments