सातवटै प्रदेशमा आज बजेट भाषण, कोरोना रोकथाम प्राथमिकतामा

अर्थ र बाणिज्य

- न्युज नेपाल

काठमाडौं । देशका सातवटै प्रदेशले आज आर्थिक वर्ष २०७८/७९ को वार्षिक आयव्यय विवरण सार्वजनिक गर्दैछन् । प्रत्येक वर्ष असार १ गते बजेट ल्याउनुपर्ने संवैधानिक प्रावधान छ ।

आज प्रदेश १, वागमती र लुम्बिनीमा दिउँसो तीन बजे बजेट वाचन हुने छ । प्रदेश २, गण्डकी, कर्णाली र सुदूरपश्चिम प्रदेशमा दिउँसो ४ बजे बजेट भाषणको तयारी छ । बजेट भाषणअघि गण्डकी र कर्णालीमा आजै नीति तथा कार्यक्रममाथि मतदान पनि हुने कार्यक्रम छ ।

यसपालीको बजेटमा सबै प्रदेशले कोरोना महामारी रोकथामलाई प्राथमिकतामा राखेका छन् । प्रदेश १ र प्रदेश २ मा चालू आर्थिक वर्षको भन्दा बजेटको आकार घट्ने भएको छ । स्रोतको संकुचनका कारण ती प्रदेशले अघिल्लो वर्षभन्दा केही सानो आकारको बजेट पेश गर्न लागेका हुन् ।

गण्डकीमा नयाँ सरकार बनेको चौंथो दिनमा नै बजेट सार्वजनिक हुन लागेको छ । अर्थमन्त्रीसमेत नियुक्त नभएको अवस्थामा मुख्यमन्त्री कृष्णचन्द्र नेपाली पाेखरेल स्वयम् बजेट भाषण गर्दैछन् । अघिल्लो सरकारले तयारी गरेको बजेटलाई नयाँ सरकारले सामान्य फेरबदल गरी अन्तिम रुप दिएको बुझिएको छ ।