सत्ता गठबन्धन कार्यदलको बैठक जारी : आजै न्यूनतम साझा कार्यक्रम ल्याउने तयारी

राजनीति

- न्युज नेपाल

काठमाडौं । सत्ता गठबन्धन कार्यदल बैठक बालुवाटारमा बसिरहेको छ ।

सरकारका न्यूनतम साझा कार्यक्रम, सरकार संचालन कार्यविधि र आचारसंहिता बनाउने गरी कार्यदलको बैठक बालुवाटारमा बसेको हो ।

केपी शर्मा ओलीको सरकारको विकल्पमा देउवा नेतृत्वमा असार २९ गते नै सरकार बने पनि गठबन्धनको समझदारी भइनसक्दा सरकारले पूर्णता पाएको छैन ।

कार्यदलका सदस्य एवम् कांग्रेस नेता डा. मिनेन्द्र रिजालका अनुसार कार्यदलले काम गर्नै नपाएका कारण न्यूनतम साझा कार्यक्रमसहितका कामलाई पूर्णता दिन ढिला भएको हो । सत्तारुढ दलहरु आआफ्नै समस्यामा हुँदा सत्ता गठबन्धनले मन्त्रिपरिषदलालई पूर्णता दिनेदेखि सरकारका साझा कार्यक्रम दिन सकेका छैनन् ।

त्यसैले आज न्यूनतम साझा कार्यक्रम तयार गरेर केही दिनभित्रै मन्त्रिपरिषदलाई पूर्णता दिने तथा सरकार संचालनलानई पनि प्रभावकारी बनाउने सत्ता गठबन्धनको तयारी छ ।
“सम्भवतः आजै न्यूनतम साझा कार्यक्रम, सरकार संचालन कार्यविधि र सरकार संचालन आचारसंहिता टुंगोमा पुग्नेछ,” गठबन्धन कार्यादलका सदस्य तथा जसपा नेता राजेन्द्र श्रेष्ठले भने, “यी काम सकिएपछि मन्त्रिपरिषदलाई पूर्णता दिने विषयमा नेताहरु जुट्नुहुने छ ।” उनले हिजोदेखि कार्यदलले पूरा समय दिएर काम गर्न पाएको भन्दै आज साँझ वा भोलि विहानसम्म कार्यदलले कामलाई पूर्णता दिने बताए ।

प्रधानमन्त्री बनेको २१ दिन भइसक्दा पनि मन्त्रिपरिषद विस्तार नहुँदा प्रधानमन्त्रीको मात्र आलोचना सुरु भएको छैन सत्ता गठबन्धनको समेत आलोचना बढेको छ ।