तत्काल अर्थतन्त्र सुधारका कार्यक्रम ल्याउनुपर्छ : वरिष्ठ उपाध्यक्ष ढकाल

अर्थ र बाणिज्य

- न्यूज नेपाल

धनगढी । नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले अर्थतन्त्रलाई थप बिग्रनबाट जोगाउन र मुलुकभित्र व्यावसायिक वातावरण बनाउन तत्काल अर्थतन्त्र सुधारका कार्यक्रम ल्याउनुपर्नेमा जोड दिनु भएको छ । नेपाल उद्योग वाणिज्य महासंघ सुदूरपश्चिम प्रदेशको छैठौँ प्रदेशसभालाई धनगढीमा सम्बोधन गर्दै वरिष्ठ उपाध्यक्ष ढकालले यस्तो बताउनु भएको हो । अर्थतन्त्रलाई बढी नियन्त्रण गर्ने प्रयास गर्दा अहिलेको असहज परिस्थिति सृजना भएको र नीतिगत सुधार नगरी यसलाई सही बाटोमा ल्याउन नसकिने पनि उहाँले प्रष्ट पार्नु भएको छ ।

’विगतमा अर्थतन्त्र सुधार गर्न राज्यले लिएका नीतिहरुले निजी क्षेत्रलाई काम गर्ने वातावरण बनाउन सकेन । यसले उद्योगी व्यवसायीहरुको मनोबल बढाउन सकेन । अब अर्थतन्त्र सुधार्न र व्यवसायीको मनोबल बढाउन तत्काल नीतिगत सुधार गर्नुपर्ने जरुरी हुन्छ’, वरिष्ठ उपाध्यक्ष ढकालले भन्नुभयो ।

अहिलेको असहज परिस्थितिमा राज्यका एक पक्षले अर्को पक्षलाई आरोप–प्रत्यारोप गर्नुभन्दा मिलेर अगाडि बढ्नुपर्नेमा उहाँले जोड दिनु भएको छ । ‘सबै क्षेत्र अप्ठेरोमा परेका छन् । बैंक तथा वित्तीय संस्था पनि निजी क्षेत्रकै अंग हुन । बैंक तथा वित्तीय संस्थालाई मात्रै गाली गरेर हुँदैन । यो नीतिगत अस्थिरताले सिर्जना गरेको समस्या हो । यसको समाधान आन्दोलन गरेर पनि हुँदैन, उहाँले भन्नुभयो, ‘यसको समाधान सरकार, नेपाल राष्ट्र बैंक तथा निजी क्षेत्र सबै मिलेर गर्नुपर्छ ।’

महासंघको सबै प्रदेशको नेतृत्व सर्वसम्मत रुपमा चयन भएको प्रसंग उठाउँदै उहाँले यसले महासंघलाई थप एकतावद्ध बनाइ सरकारसँग सहकार्य गर्न सहयोग पुग्ने बताउनुभयो । ‘आजको यस प्रदेशको निर्वाचन सकिएसँगै ७ वटै प्रदेशमा महासंघको नयाँ नेतृत्व चयन भएको छ । यसले महासंघलाई बलियो वनाउनेछ । महासंघ जति वलियो हुन्छ त्यति नै अर्थतन्त्रमा पनि हामीले योगदान पुर्याउन सक्नेछौ,’ उहाँले भन्नुभयो । सुन्दर सुदूरपश्चिम अभियानलाई बढवा दिन सके ठूलो संख्यामा यहाँ आन्तरिक तथा बाह्य पर्यटकलाई भित्र्याउन सकिने वरिष्ठ उपाध्यक्ष ढकालको भनाइ छ ।