क्यानका महानिर्देशकले स्पष्टीकरण नदिएपछि मन्त्री किरातीले प्रधानमन्त्रीसँग गरे छलफल

काठमाडाैँ । नेपाल नागरिक उड्डयन प्राधिकरणका महानिर्देशक प्रदिप अधिकारीले स्पष्टीकरण नदिएपछि संस्कृति पर्यटन तथा नागरिक उड्डयनमन्त्री सुदन किरातीले प्रधानमन्त्री पुष्पकमल दाहाल ‘प्रचण्ड’सँग छलफल गरेका छन्।

मंगलबार मन्त्री किरातीले प्रधानमन्त्री प्रचण्डसँग मन्त्रालयले सोधेको स्पष्टीकरण नदिएको र स्वायत्त निकाय हो भन्दै फेसबुकमा टिप्पणी लेखेकोबारे ‘एक्सन’ लिनुपर्ने बताएका थिए।

तर, प्रधानमन्त्रीले ‘यसबारे अपराह्न बस्ने मन्त्रिपरिषदमा छलफल गरौँला’ भनेर जवाफ दिएको स्रोतले जवाफ दियो।

किरातीले प्रधानमन्त्री प्रचण्डलाई तालुकवाला निकायले प्रक्रिया पुर्‍याएर सोधेको स्पष्टीकरणको जवाफ नदिने हो भने आफू मूकदर्शक नबन्ने बताएको मन्त्रीनिकट स्रोतले बतायो।

छलफल गरेर टुंगोमा पुग्ने प्रधानमन्त्रीले मन्त्रिपरिषदमा त्यसबारे कुरा नउठाएपछि मन्त्री किरातीले मन्त्रालयगत निर्णय गरेर कारबाहीको सिफारिस गर्ने तयारी गरेका छन्।

यसबारे उनले परामर्श गरिरहेको स्रोतले बतायो।

‘मन्त्रीले सोधेको स्पष्टीकरणको जवाफ नदिनु भनेको अराजकता हो, अब हामी मन्त्रिपरिषद्समक्ष कारबाहीको सिफारिस गर्छौं,’ मन्त्रालय स्रोतले भन्यो।

त्यस्तै मन्त्री किरातीले महालेखाको प्रतिवेदनलाई आधार बनाएर महानिर्देशक अधिकारीविरूद्ध कारबाहीका लागि अख्तियारमा फाइल पठाउने तयारी गरेको पनि स्रोतले बतायो।

‘उनका कर्तुतहरू छर्लंगै छन्, त्यसैको जवाफ र सफाइको मौका पनि दिएकै हो, अब आवश्यक छानबिन र जाँचबुझका लागि अख्तियारमा फाइल पठाउँछौं,’ मन्त्रालय स्रोतले भन्यो।

पर्यटनमन्त्री किरातीले गत मंगलबार महानिर्देशक अधिकारीको कार्यक्षमता र कार्यशैलीमाथि प्रश्न उठाउँदै ९ बुँदे स्पष्टीकरण सोधेका थिए।

मन्त्री किरातीले उक्त स्पष्टीकरणको जवाफ सात दिनभित्र मागेका थिए।

लगत्तै महानिर्देशक अधिकारीले मन्त्रालयको पत्रमा अत्यन्त जरूरी वा गोप्य पत्र भनि लेखेर सोध्नु पर्ने स्पष्टीकरण सामाजिक सञ्जाल फेसबुकका पानामा पोष्ट गरिएकाले ती स्पष्टीकरणको जवाफ आफूले दिन नसक्ने बताएका थिए।

‘फेसबुकका भित्तामा पोष्टिएका स्पष्टीकरणको जवाफ मैले दिन्न, स्पष्टीकरण सोध्ने पनि नियम, कानुन र तरिका होला नि’, फेसबुकभरि सोधिएको स्पष्टीकरणको मैले कसरी जवाफ दिनुरु’ उनले प्रतिक्रिया दिएका थिए।

स्पष्टीकरणको जवाफ नदिने अडान लिएका महानिर्देशक अधिकारीले सोमबार सामाजिक सञ्जालमा नागरिक उड्डयन प्राधिकरण स्वायत्त निकाय रहेको समेत उल्लेख गरेका थिए।

Comments