केन्द्रीय समिति र पदाधिकारी बैठकअघि शेखर पक्ष छुट्टै छलफलमा

समाचार

- न्युज नेपाल

काठमाडाैँ । ११ महिनापछि केन्द्रीय कार्यसमितिको बैठक बस्ने भएपछि नेपाली कांग्रेसको डा. शेखर कोइराला समूहले आफ्नो पक्षको तयारी बैठक बोलाएको छ । केन्द्रीय समिति बैठकअघि शेखरको सम्पर्क कार्यालयमा सोमवार बिहान समूहको बैठक बसेको हो ।

लामो समयपश्चात केन्द्रीय समिति बैठक बस्ने भएपछि सम्भावित एजेण्डाको विषयमा टुंगो लगाउने तयारी उनीहरूको छ । आजै दिउँसो २ बजे सभापति शेरबहादुर देउवाले आफ्नो निवास धुम्बाराहीमा पदाधिकारी र पूर्व पदाधिकारीको बैठक पनि बोलाएका छन् ।

यो बैठकमा पनि प्रस्तुत हुने एजेण्डा तय गर्न शेखर पक्ष छलफलमा जुटेको हो । कांग्रेसको केन्द्रीय समितिको बैठक मंगलबार दिउँसो १ बजे केन्द्रीय कार्यालय सानेपामा बस्दैछ ।

चुनावी समीक्षा, सरकारमा कांग्रेसको सहभागिता, नयाँ दलको चुनौती, संगठनको भद्रगोल, संगठन विस्तारसहितका विषयमा छलफल गर्न माग भए पनि देउवाले केन्द्रीय समिति बैठक टार्दै आएका थिए ।

११ महिनापछि बल्ल बैठक बस्ने भएपछि सभापतिको कार्यशैलीविरुद्ध शेखर र गगन समूहका नेताले खरो रुपमा उत्रिने तयारीमा छन् ।

साथै नक्कली भुटानी शरणार्थी प्रकरणमा मुछिएका कांग्रेस नेता बालकृष्ण खाँणलाई निलम्बन गर्नुपर्ने मागप्रति पनि देउवा मौन छ । यो समूहले यस विषयमा समेत बैठकमा सभापतिको गम्भीर ध्यानाकर्षण गराउने तयारी गरेको छ ।