एम्बाप्पे चम्किँदा पीएसजीको सानदार जित, उपाधिका लागि अब एक जित आवश्यक

काठमाडाैँ ।  कप्तान केलियन एम्बाप्पे चम्किएको खेलमा पेरिस सेन्ट जर्मेन (पीएसजी) ले फ्रेन्च  लिग वानमा सानदार जित हात पारेको छ ।

गएराति भएको खेलमा एम्बाप्पेले दुई गोलसँगै एक असिस्ट प्रदान गरेपछि पीएसजीले घरेलु टोली लोरिएन्टमाथि ४-१ गोलअन्तरको जित निकालेको हो । जितसँगै पीएसजी लिग वानको उपाधि नजिक पुगेको छ ।

खेलको १९औँ मिनेटमा ओसमाने डेम्बेलेले गोल गर्दै पीएसजीलाई सुरुवाती अग्रता दिलाएका थिए । ओसामानेले सेनी मायुलुको पासमा गोल गरेका थिए । त्यसपछि खेलको २२औँ मिनेटमा कप्तान एम्बाप्पेले गोल गर्दै पीएसजीको अग्रता दोब्बर पारेका थिए । एम्बाप्पेले नुनो मेन्डेजको पासमा गोल गरेका हुन् ।

पहिलो हाफमा २-० को अग्रता लिएको पीएसजीले दोस्रो हाफमा थप २ गोल गर्दा १ गोल खान पुगेको थियो । खेलको ६०औँ मिनेटमा डेम्बेलेले व्यक्तिगत दोस्रो तथा टोलीका लागि तेस्रो गोल गरे । उनले एम्बाप्पेको पासमा गोल गरेका थिए ।

त्यसपछि खेलको ७३औँ मिनेटमा लोरिएन्टका लागि मोहम्मद बाम्बाले गोल गर्दै खेल ३-१ को अवस्थामा ल्याए । तर, खेलको ९०औँ मिनेटमा एम्बाप्पेले गोल गर्दै पीएसजीलाई ४-१ को अग्रता दिलाएका थिए । उनले कोलो मुआनीको पासमा गोल गरेका थिए । बाँकी समयमा गोल हुन नसकेपछि खेल पीएसजीले ४-१ गोलअन्तरले जितेको हो ।

जितसँगै शीर्ष स्थानमा रहेको पीएसजीको ३० खेलबाट ६९ अंक भएको छ । र, दोस्रो स्थानमा रहेको मोनाकोलाई ११ अंकले पछि पारेको छ । मोनाकोको ३० खेलबाट ५८ अंक छ ।

लिगमा अब चार खेल बाँकी रहँदा पीएसजीलाई च्याम्पियन बन्न मात्रै एक जितको आवश्यकता छ । अब चारमध्ये एक खेलमा मात्रै जित हात पारे पनि पीएसजी लिग वानको च्याम्पियन बन्नेछ ।

पीएसजीसँग पराजित भएको लोरिएन्ट भने ३० खेलबाट २६ अंकका साथ लिगको १७औँ स्थानमा छ ।

Comments