जनआस्थाविरुद्ध मुद्धा हालेका विनोद चौधरीको फेरि लज्जास्पद हार

breaking news

काठमाडौं । विवादास्पद अर्बपति व्यवसायी तथा नेपाली काँग्रेसका सांसद विनोद चौधरीले फेरि पनि जनआस्था प्रकाशन प्रालिसँग मुद्धा हारेका छन् । जनआस्थाका अध्यक्ष किशोर श्रेष्ठसहितलाई विपक्षी बनाएर दायर गरिएको पछिल्लो मुद्दामा दाबी नपुग्ने फैसला ललितपुर जिल्ला अदालतले गरेपछि चौधरी फेरि हिस्स भएका हुन् ।

जिल्ला अदालतका एक नम्बर न्यायाधीश पुनाराम खनालको इजलासले मुद्धामा आइतबार दाबी नपुग्ने फैसला सुनाएको हो । जनआस्थाले गत असार २४ गते ‘लिम्चुङबुङमा पहिले मदिरा, अहिले वाइवाइ बर्जित’ शीर्षकमा समाचार प्रकाशितत गरेको थियो । सो समाचारविरुद्ध चौधरीको सिजी फुड्स नेपालको तर्फबाट अधिकार प्राप्त व्यक्ति मन्दिरा गौतमले गत साउन १५ गते अदालतमा मुद्दा दायर गरेकी थिइन् ।

उदयपुर लिम्चुङबुङ गाउँपालिकाको १८ औं कार्यपालिका बैठकले सिसाजन्य मदिरा तथा पेयपदार्थहरुमा रोक लगाउने निर्णय गरेको थियो । गाउँपालिका अध्यक्ष मेजरकुमार राईले दोस्रो चरणमा चाउचाउलगायतका ‘जंकफुड’ मा प्रतिबन्ध लगाउने बताएका थिए । पैसासँगै स्वास्थ्यमा पनि गम्भीर असर पुग्ने बताउँदै उनले चाउचाउको बिक्री वितरणमा निषेध गर्ने जानकारी दिएका थिए । त्यसै समाचारबाट आफ्नो गाली बेइज्जती भएको चौधरीको फिराद थियो ।

आफू र कम्पनीविरुद्ध समाचार छापेको निहुँमा चौधरीले जनआस्थाविरुद्ध जति पनि मुद्धा हालेका छन्, त्यसमा हार्दै आएका छन् । प्रमाण नपुग्ने विषयमा मुद्दा हालेर दुःख दिँदै आएका चौधरीले पछिल्लो पटक हालेको मुद्दामा पनि लज्जास्पद हार व्यहोरेका हुन् ।