नेपाल र थाइल्याण्डबीच संस्कृति र पर्यटनका क्षेत्रमा सहकार्य सम्बन्धी सम्झौता पत्रमा हस्ताक्षर

अर्थ र बाणिज्य

काठमाडौं । नेपाल र थाइल्याण्डबीच संस्कृति र पर्यटनका क्षेत्रमा सहकार्य सम्बन्धी सम्झौता पत्रमा हस्ताक्षर भएको छ ।

आज थाइल्यान्डको औपचारिक भ्रमणमा रहेका प्रधानमन्त्री के.पी. शर्मा ओली र उनका थाई समकक्षी पे थोङ् थान् शिनावातबीच भेटवार्तापछि सम्झौतामा हस्ताक्षर भएको हो ।

परराष्ट्र मन्त्रालयका अनुसार आज दुई देशबीचका गैरसरकारी र व्यावसायिक संस्थाबीच विभिन्न ६ वटा सहमतिपत्र आदाप्रदान भएकोे जनाएको छ । भेटवार्तामा प्रधानमन्त्री ओलीका साथ परराष्ट्रमन्त्री डा. आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक विकास सल्लाहकार डा. युवराज खतिवडा, मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राईलगायत सहभागी थिए ।

त्यस्तै, प्रधानमन्त्री ओली आजै सम्मानमा समकक्षी शिनावातले आयोजना गरेको दिवभोजमा सहभागी हुनेछन् । प्रधानमन्त्री ओलीलाई आज बिहान बैंककको सरकारी भवनमा गार्ड अफ अनर दिइएको थियो । सो अवसरमा प्रधानमन्त्री ओलीलाई थाइल्याण्डकी प्रधानमन्त्री पैटोङटार्न सिनावात्राले स्वागत गरेकी थिइन् ।

थाइल्यान्डका प्रधानमन्त्री शिनावातको मैत्रीपूर्ण निमन्त्रणामा नेपालका प्रधानमन्त्रीबाट पहिलो पटक थाइल्यान्डको औपचारिक भ्रमण भएको हो । यो भ्रमणबाट दुई देशबीचको आपसी सम्बन्ध विस्तार र सहकार्यमा योगदान पुग्ने अपेक्षा गरिएको छ ।

प्रधानमन्त्री ओलीले २२ गते बिमेस्टक शिखर सम्मेलनमा सहभागी तथा सम्बोधन गर्ने कार्यक्रम छ ।