कवि ठाकुर बेलबासेको कविताकृति ‘चोटहरुको उत्सव’ को विमोचन

काठमाडौं । कवि तथा सञ्चारकर्मी ठाकुर बेलबासेको नवितम् कविताकृति ‘चोटहरुको उत्सव’ कविता संग्रहको शुक्रबार विमोचन गरिएको छ । काठमाडौंमा शुक्रबार आयोजित एक कार्यक्रममा उक्त कृतिको वरिष्ठ कवि तुलसी दिवस, साहित्यकार एवं राजनीतिज्ञ शान्ता मानवी, गायिका आनी छोइङ डोल्मा लगायतले विमोचन गरे ।

वरिष्ठ कवि, साहित्यकार एवम् संस्कृतिविद् तुलसी दिवसले ‘चोटहरुको कविता’ संग्रह पढेपछि चोटहरुले मान्छेलाई मान्छे बनाउँछ भन्नेमा आफू विश्वस्त भएको जनाउनु भयो । चोटहरु मानिसको जीवनमा अत्यन्त महत्वपूर्ण हुने जनाउँदै उहाँले चोट पाएपछि नै मान्छेको इतिहास नेपालमा मात्रै होइन, विश्वमै अम्मर बनेको दृष्टान्त प्रस्तुत गर्नुभयो । बेलबासेको कृति आफूलाई सार्थक लागेको बताउँदै उहाँले भन्नुभयो, “चोट परेपछि दुःखपीडा त लाग्छ नै, आँसु त चुहिन्छ नै तर आँसु चुहुनु पनि कहिलेकाहीँ हाँसोभन्दा बढी महत्वपूर्ण हुन्छ ।” उत्सव खुसी र रमाइलोको मात्रै होइन, चोटहरुको पनि हुन्छ भन्ने सन्देश ‘चोटहरुको उत्सव’ भन्ने कविता संग्रहले प्रष्ट पारेको पनि वरिष्ठ कवि दिवसले जनाउनु भयो । धेरै कवि तथा साहित्यकारहरु चोट खाएर असाधारण क्षमता भएको व्यक्ति भएर देश–विदेशमा नाम राखेको उहाँको भनाइ थियो ।

कृतिका समीक्षक शंकर तिवारीले ‘चोटहरुको उत्सव’ कृति मार्फत विचार र बिम्बमा खेल्ने क्षमता आफूले बेलबासेको कवितामा पाएको भन्दै प्रशंसा गर्नुभयो । बेलबासेका कविताहरुमा आशा र निराशाका कुराहरु, सहज र सरल प्रेम, वोधगम्य-अवोधगम्यलगायत समेटिएको तिवारीले प्रष्ट पार्नुभयो ।

लोकार्पित कृतिका कविताहरु कवि विश्व सिग्देल, मणि लोहनी, सोझो गाउँले, हेम प्रभास र शोभा अधिकारीले वाचन गरेका थिए । कार्यक्रममा साहित्यकार शान्ता मानवी, पृथ्वी विचारका अभियन्ता झलक बस्नेत, राजकुमार बानियाँ, सोभित उप्रेतीलगायत दुईसय जनाको उपस्थिति रहेको थियो ।

कविताकृति सार्वजनिकीकरण समारोहमा आयोजक सुनसरी वाङमय प्रतिष्ठानको तर्फबाट कार्यक्रमको सुरुवातमा पूर्णबहादुर श्रेष्ठले स्वागत मन्तव्य व्यक्त गर्नु भएको थियो । कार्यक्रमको अध्यक्षता गर्दै प्रष्ठिानका अध्यक्ष छविरमण सिलवालले कविताकृति प्रकाशन गर्ने अवसर दिएको भन्दै कवि बेलबासेलाई धन्यवाद दिँदै सम्मानपत्रले सम्मान गर्नुभयो ।

Comments