एमालेको धनुषा अधिवेशनमा नेताहरु भिड्दा पाँचजना घाइते

Blog

काठमाडौं । नेकपा एमाले धनुषाको ८ औं जिल्ला अधिवेशन स्थलमा दुई पक्षीय नेताहरु भिड्दा दुई नेतासहित पाँचजना घाइते भएका छन् ।

गत वैशाख २० गतेदेखि सुरु अधिवेशनमा अन्तिम नामावली प्रकाशनको विषयलाई लिएर दुई पक्षबीच विवाद हुँदा दह्रो कुटाकुट र कुर्सी हानाहान चलेको थियो जसमा परेर दुई नेतासहीत पाँच जना घाइते भएका हुन् ।

भोला यादव र लक्ष्मी नारायण यादवबिच सर्वसम्मतको प्रयास असफल भएपछि निर्वाचन प्रक्रिया अगाडि बढाइएको हो ।

अधिवेशनमा सोमबार राति नै मनोनयन दर्ता भएको थियो । उम्मेदवारको अन्तिम नामावलीमा नाम थपघट देखिएपछि विवाद भएको एक नेताले बताए ।

अधिवेशनमा भोला यादव र लक्ष्मी नारायण यादवबिच प्रतिस्पर्धा हुँदै छ भने, उपाध्यक्षमा जयप्रकाश सुनरैत यादव र तेजनारायण यादव तथा सचिवमा दिप नारायण ठाकुर (दिपन) र धिरेन्द्रकुमार मण्डलको उम्मेदवारी दिएका छन् ।

त्यस्तै, उपसचिवमा सचिव विक्रम थापा, सुरेश ठाकुर र हरि किशोर यादव तथा उपसचिव महिलातर्फ किरण कापर, रुका कुमारी मिश्र र सारदा घिसिङले उम्मेदवार परेको छ । अधिवेशनबाट पाँच पदाधिकारीसहित १३५ सदस्यीय जिल्ला कमिटी चयन हुने निर्वाचन समितिले जनाएको छ ।

आज बिहनबाट निर्वाचन सुरु हुने भनिएपनि उम्मेदवाहरुबिच अन्तिम मतदानमावलीका विषयमा विवाद भएर भिडन्त परेपछि निर्वाचन स्थगित भएको थियो ।