‘बाबुराम बुद्धि नभएको डाक्टर, आजकल प्रतिक्रियावादीले नै पत्याउँदैन’

काठमाडौं । कुनै समय नेकपा माओवादीमा सबैभन्दा ठूलो सारथी रहेका पूर्व प्रधानमन्त्री तथा नेसपाका अध्यक्ष डा. बाबुराम भट्टराईलाई नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले बुद्धि नै नभएको डाक्टर भन्दै टिप्पणी गरेका छन् ।

रुकुमपूर्वमा आयोजित पत्रकार सम्मेलनमा बोल्दै उनले, पूर्वसहयात्री समेत रहेका भट्टराईसँग एकता सम्भव नभएको बताएका छन् । प्रचण्डले, गोरखामा चुनाव लड्दा नै मिल्ने भनेपनि कम्युनिष्टको नाम नै सुन्न तयार नभएपछि एकता सम्भव नभएको बताए ।

पत्रकार सम्मेलनमा उनले भने, ‘बाबुरामसँग हामीले एकता गर्ने भनेकै हो नि ! गोरखामा चुनाव लड्दा हाम्रो नारायणकाजी कमरेड, म, बाबुरामले लहै अब चाहिँ यो चुनावमात्रै होइन अब पार्टी पनि एउटै बनाउने भनिएको थियो । तर, उहाँले पछि कम्युनिष्टको नाम सुन्न चाहनुहुन्न । कम्युनिष्ट पार्टी नाम राख्ने हो भने म त एकता गर्दिनँ भनेपछि अब हामी के मर्ने ? बाबुरामको लागि ? कम्युनिष्ट पार्टी नभन्ने, माक्र्सवाद नभन्नेसँग के गरी एकता गर्ने ? भन्दै प्रश्न गरे । ’

प्रचण्डले थपे, ‘उहाँ त खिइँदै खिइँदै अब त पूरै प्रतिक्रियावादीसँग गएर मिल्नुभएको छ । प्रतिक्रियावादीले नै पत्याउँदैन आजकल । हाँसोको पात्र भएका छन् बाबुराम के देशभरि कस्तो बुद्धि नभएको डाक्टर । सबभन्दा बुद्धि नभएको डाक्टर भनेर चिन्छन् मान्छेले । त्यस्तासँग के गरी एकता गर्ने ?’

उनले बाबुरामसँग भएका गङ्गानारायण श्रेष्ठलगायतका थुप्रै भ्रममा परेर गएका सबै फर्किने तयारीमा रहेको बताए ।

प्रचण्डले थपे, ‘यो एकता होइन त ? अब बाबुरामलाई के गरी ल्याउने अब ? उनको दिमाग चाहिँ ठाउँमा हुन पयो र पो ल्याउन सकिन्छ। सबै एकता भनेर निरपेक्ष एकता भन्ने हुँदैन । त्यो सापेक्ष हुन्छ ।’

उनले पार्टी एकताको लागि विचार, दृष्टिकोण, प्रवृत्ति मिल्नुपर्ने भन्दै बाबुरामसँग एकता गरेर फेरि ठूलो भइहाल्ने पनि नभएको पनि सुनाए ।

https://www.facebook.com/share/v/1GiZ8MunNw/

Comments