अख्तियारको छानवीन अनुसन्धानलाई गृह मन्त्रालयको पुर्ण सहयोग रहने दाबी

काठमाडौं । केही दिन अघि अख्तियार दुरुपयोग अनुसन्धान आयोगले त्रिभुवन अन्तर्राष्ट्रिय विमानस्थलबाट केही अध्यागमनका कर्मचारी, मेनपावर कम्पनी, ट्राभल एजेन्सीहरूको सेटिङमा भिजिट भिसाबाट गैरकानुनी रूपमा वैदेशिक रोजगारमा दुवई, कतार, युएई, खाडीमुलुक र युरोपतिर पठाएको विषयमा छापा मारि कागजात, मोवाइल र कम्प्युटर कब्जामा लिएर छानवीन गरिरहेको छ।

यसमा त्रिभुवन विमानस्थल अध्यागमन कार्यालयका प्रमुख तिर्थराज भट्टराईलाई नियन्त्रणमा लिएर सोधपुछ गरि हाजिर जमानीमा छाडेको छ। यस कार्यमा अध्यागमनका एक दर्जन अध्यागमन अधिकृतहरू अनुसन्धानको घेरामा छन।

खाडीमुलककमा भिजिट भिसामा कामदार उडाउदा पुरूष कामदारसँग २० हजार, महिला कामदारसँग प्रतिव्यक्ति ३० हजार र युरोप जाने कामदारसँग प्रति व्याक्ति एक लाख लिएको आशंकामा छानवीन भैरहेको छ। गृह मन्त्रालयले यस्तो बदमासीको विषयमा गुनासो सुन्ने बित्तिकै अध्यागमन प्रमुख भट्टराईलाई मन्त्रालय तानी मन्त्रालयका सहसचिवलाई त्रिभुवन विमानस्थल अध्यागमन कार्यालयमा पठाएको छ।

यस अनियमितताका विषयमा सादगी र भलादमी गृह मन्त्री रमेश लेखक र गृह सचिव गोकर्णमणी दुवाडीले समेत भागबन्डा पाएको भनी केही पत्रपत्रिका, अनलाइन र टेलिभिजनहरूमा समाचार आएका छन। यस विषयमा कुनै सत्यता नभएको गृह मन्त्रालयका सहसचिव छवि रिजालले जेठ १० गते एक विज्ञाप्ति प्रकाशित गरि जनाएका छन।

सहसचिव रिजालले विज्ञाप्तिमा “विगत केही दिनयता त्रिभुवन अन्तर्राष्ट्रिय विमानस्थल अध्यागमन कार्यालयको घटनासँग मन्त्रालयको नेतृत्वलाई जोडेर विभिन्न पत्रपत्रिका तथा सामाजिक सञ्जालमा आएका समाचार एवम् क्रियाप्रतिक्रिया प्रति मन्त्रालयको गम्भीर ध्यानाकर्षण भएको र यस प्रकारका कपोलकल्पित, भ्रामक र आधारहीन समाचार प्रकाशित र प्रसारित भएको प्रति मन्त्रालय दुःख व्यक्त गर्दछ“ भनी जनाएका छन।

गृहको विज्ञाप्तिमा भनिएको छ–“यस्ता कुनैपनि गैरकानूनी वा भ्रष्टाचारजन्य कार्यमा मन्त्रालयको नेतृत्वको कुनै प्रकारको संलग्नता नरहेको र नरहने विषय स्पष्ट गर्दछौ। साथै, विषयको गम्भीरतालाई मध्यनजर गरी सत्यतथ्य विषयवस्तु मात्र प्रकाशन र प्रसारण गरिदिनु हुन सबैमा अनुरोध गर्दछौं। मुलुकमा शान्ति सुरक्षा, अमनचयन तथा सुशासन कायम गर्नका लागि गृह प्रशासन निरन्तर क्रियाशील रहेको छ। मन्त्रालयले सबै प्रकारका अनियमितता र अपराधका घटनामा शून्य सहनशीलताको नीति अवलम्बन गर्दै गृह प्रशासनलाई व्यवस्थित गर्नका निम्ति नीतिगत तथा संस्थागत सुधारका कार्यहरू समेत गर्दै आइरहेको छ।”

गृहको विज्ञाप्तिमा भनिएको छ–“पछिल्लो समयमा त्रिभुवन अन्तर्राष्ट्रिय विमानस्थल अध्यागमन कार्यालयको काम कारवाहीका सम्बन्धमा अख्तियार दुरूपयोग अनुसन्धान आयोगले छानविन गरिरहेको हुँदा अनुसन्धान कार्य पूरा भएपछि सत्यतथ्य व्यहोरा सबैको जानकारीमा आउने नै छ। आयोगबाट हुने छानबिन तथा अनुसन्धान सम्बन्धी कार्यमा मन्त्रालयको पूर्ण सहयोग रहने व्यहोरा समेत जानकारीका लागि अनुरोध छ।”

Comments