कसरी हुँदैछ औपचारिक क्षेत्रका श्रमिकको पारिश्रमिक वृद्धि?

breaking news

काठमाडौँ । औपचारिक क्षेत्रमा कार्यरत श्रमिकहरूको न्यूनतम पारिश्रमिक पुनरवलोकन प्रक्रिया वैज्ञानिक विधिबाट अघि बढाउने तयारी गरिएको छ । श्रम, रोजगार तथा सामाजिक सुरक्षा मन्त्रालयले गठाएको समितिले श्रमिक तथा रोजगारदाताको हित सुनिश्चित हुने गरी सन्तुलित र तथ्यमा आधारित पारिश्रमिक संरचना बनाउने प्रयास थालेको हो ।

सहसचिव प्रदीप कोइरालाको संयोजकत्वमा गठन भएको समितिले विगतका पुनरवलोकनको अभ्यासलाई भन्दा फरक ढंगले यसपटक उत्पादन, उत्पादकत्व, श्रमिकको माग र वर्तमान बजार मूल्यलाई समेटेर विश्लेषण गर्ने बताइएको छ ।

हाल औपचारिक क्षेत्रमा कार्यरत श्रमिकको न्यूनतम पारिश्रमिक १०,८२० रुपैयाँ छ भने महँगी भत्ता ६,४८० रुपैयाँ गरी कुल १७,३०० रुपैयाँ रहेको छ । उता, चिया बगानमा कार्यरत श्रमिकहरूको पारिश्रमिक ८,९३४ रुपैयाँ र महँगी भत्ता ४,९५९ रुपैयाँ गरी १३,८९३ रुपैयाँ रहेको छ ।

वर्तमान पारिश्रमिक संरचना २०८० साल साउन १ गतेदेखि लागू गरिएको हो । श्रम ऐन अनुसार, औपचारिक क्षेत्रका श्रमिकको पारिश्रमिक प्रत्येक दुई वर्षमा पुनरवलोकन गरिनु पर्ने व्यवस्था छ । यसपटकको पुनरवलोकनले श्रमिक र रोजगारदाता दुवैको दीर्घकालीन हितमा पर्ने अपेक्षा गरिएको छ ।