प्रधानमन्त्री ओलीले स्पेनी समकक्षी सान्चेजसंग भेटवार्ता गर्ने

New Post

- न्यूज नेपाल

काठमाडाैं । स्पेनको औपचारिक भ्रमणमा जान लागेका प्रधानमन्त्री केपी ओलीले स्पेनी समकक्षी पेद्रो सान्चेजसंग भेटवार्ता गर्ने भएका छन् ।

सन २०१८ मा स्पेनमा नेपाली राजदूतावास स्थापना भएपछि प्रधानमन्त्री केपी ओलीको यो विदेश भ्रमण पहिलो उच्चस्तरिय अवसर हो ।

संयुक्त राष्ट्रसंघीय विकासका लागि वित्त कार्यक्रमको चौथो सम्मेलनमा भाग लिनका लागि स्पेन जान लागेका प्रधानमन्त्री ओलले आगामी सोमबार (जुन ३०) स्पेनी समकक्षीसँग भेटवार्ता गर्ने कार्यक्रम तय भएको बताइएको छ ।

स्पेनस्थित नेपाली राजदूत शनिल नेपालका अनुसार दुई प्रधानमन्त्रीबीच सेभियामा आधा घण्टा लामो भेटवार्ता हुनेछ।

उसोतः नेपाल-स्पेन सम्बन्धमा यसअघि पनि केही ऐतिहासिक क्षणहरू रहिआएका छन्। सन् १९८३ मा स्व. राजा वीरेन्द्र र रानी ऐश्वर्यले स्पेनको राजकीय भ्रमण गरेका थिए। सो अवसरमा सांस्कृतिक सहयोगसम्बन्धी सम्झौतामा हस्ताक्षर भएको थियो।

त्यसको चार वर्षपछि, सन् १९८७ मा स्पेनका राजा खुआन कार्लोस र रानी सोफियाले नेपाल भ्रमण गरेका थिए। यस्तै, सन् १९८४ मा राजा वीरेन्द्रले स्पेनी जनता र सरकारलाई ‘हिमालयन रेड पाण्डा’को एक जोडी उपहार दिएका थिए ।

नेपाल-स्पेनबीच औपचारिक कूटनीतिक सम्बन्ध सन् १९६८ को मे १३ मा स्थापना भएको हो।