‘नेपाल मुलका विदेशी नागरिक (पीएनओ)’ लाई परिचयपत्र उपलब्ध गराउन माग

काठमाडौं। थाइल्यान्डमा स्वास्थ्यमन्त्री प्रदीप पौडेलसँग विभिन्न संघसंस्थाका प्रतिनिधिसँग महत्वपूर्ण भेटघाट भएको छ । थाइ नेपाली संघ, एनआरएनए, यूएन एम्बेसी, नेपाल एयरलाइन्सलगायत विभिन्न संघसंस्थाका पदाधिकारी तथा प्रतिनिधिसँग महत्वपूर्ण भेटघाट भएको हो ।

स्वास्थ्यमन्त्री पौडेलले नेपालमा स्वास्थ्य क्षेत्रको विकासका लागि हुँदै गरेका काम, प्रयास, योजनालगायतका सम्बन्धमा चर्चा गर्नुभयो । मन्त्री पौडेलले थाइल्यान्ड सरकारले गरिब जनतालाई दिएका स्वास्थ्य सेवा, बीमालगातयका सुविधाहरुको जानकारी लिनु भयो । बाहिरी देशबाट लगानी बढाएर नेपालको कसरी आर्थिक विकास गर्न सकिन्छ भन्ने सम्बन्धमा मन्त्री पौडेलले चासो राख्नु भयो । नेपालमा लगानी गर्नका लागि उहाँले सबैलाई आग्रह पनि गर्नुभयो । विदेशका नागरिकहरुलाई नेपालमा कसरी जोड्न सकिन्छ र उनीहरुको सीप, क्षमता कसरी प्रयोगमा ल्याउन सकिन्छ भन्ने सम्बनधमा पनि मन्त्री पौडेलले चासो राख्नु भएको थियो ।

स्वास्थ्यमन्त्री पौडेल यूएनको कार्यक्रममा सहभागी हुन जाने क्रममा अन्य संघसंस्थाका पदाधिकारीसँग पनि भेटघाट गर्नु भएको हो । मन्त्री पौडेलले यूएनको कार्यक्रममा सहभागी हुँदा विकाससम्बन्धी धेरै अनुभव लिनु भएको र ती अनुभवहरु नेपालमा पनि लागु गर्न सकिने सम्भावना देखेको भनाइ राख्नु भएको थियो । उहाँले थाइल्याण्ड, बर्मा, फिजी, मलेसियालगायत विभिन्न देशमा बसोबास गरिरहेका नेपालीहरु र उनीहरु त्यहाँ कसरी आइपुगे भन्ने सम्बन्धमा पनि जानकारी लिनु भयो । उहाँको जिज्ञासालाई थाइ नेपाली संघ, एनआरएनएलगायत संस्थाका पदाधिकारीहरुले प्रष्ट पारिदिएका थिए ।

कार्यक्रममा पीपुल अफ नेपाली अरिजिन (पीएनओ) को सम्बन्धमा स्वास्थ्यमन्त्री पौडेललाई ध्यानाकर्षण गराइएको पीपुल अफ नेपाली अरिजिन (पीएनओ) का अध्यक्ष तथा थाई नेपाली संघका वर्तमान संरक्षक कुमार कार्कीले न्यूज नेपाललाई जानकारी दिनु भयो । नेपाल मुलका विदेशी नागरिक (पीएनओ)’ लाई परिचयपत्र उपलब्ध गराउन मन्त्री पौडेलसँग माग गरिएको कार्कीले बताउनु भयो । अध्यक्ष कार्कीले भन्नुभयो, “बाहिर आएका नेपालीहरुलाई नेपाल सरकारले अझै पनि परिचयपत्र दिएको छैन, हाम्रो माग एनआरएनएलाई जस्तै परिचयपत्र देओस् भन्ने हो ।” पीएनओ, थाइ नेपाली संघ र थाइल्याण्ड एनआरएनएको तर्फबाट परिचयपत्र उपलब्ध गराउन निवेदनपत्र पेस गरिएको थियो ।

योभन्दा अगाडि पनि नेपालका वर्तमान तथा पूर्वप्रधानमन्त्री, मन्त्री, सांसद, सचिवहरुलगायतसँग भेटघाट गरेर निवेदनपत्र पेस गरेको कार्कीले बताउनु भयो । मन्त्री पौडेलसँग भेटघाट गर्न पाउँदा खुसी लागेको कार्कीले प्रतिक्रिया दिनु भयो ।

Comments