वर्षासँगै अवरुद्ध भएको बीपी राजमार्ग सुचारु, कटान र लेदोले सास्ती

अर्थ र बाणिज्य

बनेपा- आइतबार साँझको अविरल वर्षासँगै आएको लेदो र बाढीले अवरुद्ध भएको बीपी राजमार्ग सोमबार बिहानबाट पुनः सुचारु भएको छ। काभ्रेपलाञ्चोकको रोसी गाउँपालिका–९ पिन्थली र वडा नम्बर ११ स्थित माम्ती खोलामा आएको लेदो तथा भेलले राजमार्ग दुई स्थानमा पूर्णरूपमा अवरुद्ध बनाएको थियो।

एकै रात दुई स्थानमा क्षति

आइतबार साँझ करिब साढे ६ बजे पिन्थलीमा खहरे खोलाले बगाएको लेदोले राजमार्ग अबरुद्ध गर्‍यो। त्यसको केही समयपछि, राति १०:३५ बजे माम्ती खोलामा आएको भेल बाढीले सडक नै कटान गरेपछि यातायात पूरै ठप्प भएको थियो। जिल्ला प्रहरी कार्यालय काभ्रेपलाञ्चोकका अनुसार, पिन्थली खण्ड सोमबार बिहान ५:५५ बजेबाट र माम्ती खण्ड ६ बजेबाट पुनः सञ्चालनमा आएको हो।

पुनः अवरुद्ध हुने जोखिम कायमै

गत असोजमा आएको बाढीले कटुन्जेदेखि सिन्धुलीको सिमाना बोक्सी कुना खण्डसम्मको २९ किलोमिटर राजमार्गमा ठुलो क्षति पुगेको थियो। त्यसयता, सामान्य वर्षा भए पनि सो क्षेत्रमा सडकमै लेदो पस्ने र कटान हुने समस्याले पुनःपुनः राजमार्ग अवरुद्ध हुने जोखिम देखिएको छ।

सुरक्षाका लागि २१ उपकरण खटाइयो

सडक डिभिजन कार्यालय भक्तपुरले सम्भावित बाढी तथा पहिरोका कारण राजमार्ग नियमित अवरुद्ध नहोस् भनेर २१ वटा हेभी उपकरण तयारी अवस्थामा राखिएको जनाएको छ। राजमार्गको अवस्थाले वर्षायाममा यात्रा गर्ने यात्रुहरूलाई सर्तकता अपनाउन सुझाव दिइएको छ।