पानी नपर्दा खेतमा चिरा पर्न थाल्यो, किसान चिन्तित

अर्थ र बाणिज्य

काठमाडौं । असार महिनामा समेत वर्षा नहुँदा पश्चिम नवलपरासीमा भर्खर रोपेको धान खेतमा चिरा पर्न थालेको छ । पर्याप्त सिँचाइ सुविधा नहुँदा आकाशे पानीको भरमा खेती गर्दे आएका किसानहरू अहिले धान रोपेको खेत सुख्खा भएपछि चिन्तित बनेका छन् ।

जिल्लामा अधिकांश स्थानमा धान रोपाइ सकिएको छ । पानी नपर्दा खेतमा चिरा परेको छ भने भर्खर रोपेको धान पहेँलिन थालेको छ । कृषि ज्ञान केन्द्र नवलपरासीका प्रमुख रवीन्द्रनाथ चौवेले वर्षा नहुँदा धानको वृद्धि विकासमा असर पर्ने र गाज हाल्न नसक्दा उत्पादन कम हुने जोखिम रहेको बताउनुभयो । खेत सुख्खा हुँदा धेरै झारपात उम्रने र धान बालीलाई असर गर्ने सम्भावना समेत हुन्छ ।

जिल्लामा २१ हजार हेक्टर क्षेत्रफलमा धान खेती हुँदै आएको छ । धान रोप्न बाँकी भएका किसान पनि खेतमा तयार भएको ब्याड सुक्न थालेपछि चिन्तित भएका छन् । सुनवल–२ का कृषक हरिलाल गुप्ताले दुई बिगाहा खेतमा धान रोप्न बाँकी रहेको बताउनुभयो । प्रधानमन्त्री कृषि आधुनिकीकरण परियोजनाले कुलो व्यवस्थापन गरिदिएका कारण गाउँमा केही स्थानमा रोपाइ भएको भए पनि पानी नपर्दा कुलोमा पनि पानी सुक्न थालेको गुप्ताले बताउनुभयो ।

किसानहरूले खाल्डाखुल्डीमा जमेको पानी तानेर रोपाइ गरेको भए पनि पर्याप्त वर्षा नहुँदा रोपेको धान सुक्दै गएको छ । पश्चिम नवलपरासी सहित तराईका जिल्लामा केही दिन देखि चर्को घाम लागेको छ । जिल्लामा तिनै तहका सरकारले सिँचाइ पूर्वाधार निर्माण गरेको भए पनि त्यो पर्याप्त हुन सकेको छैन । जिल्लामा अझै आधा बढी खेतीयोग्य जमिनमा सिँचाइ सुविधाको अभाव छ ।