एसियाकप-२०२५ खेल तालिका सार्वजनिक, भारत र पाकिस्तान १४ सेप्टेम्बरमा भिड्ने

खेलकुद

- न्यूज नेपाल

काठमाडौं । युएइमा आगामी सेप्टेम्बर ९ देखी २८ सम्म आयोजना हुने एसियाकप क्रिकेट प्रतियोगिताको खेल तालिका सार्वजनिक भएको छ ।

एशियन क्रिकेट काउन्सिल (एसीसी)ले सार्वजनिक गरेको खेल तालिका अनुसार भारत र पाकिस्तान एकै समूहमा परेका छन् । यि दुवै टोली दुई कट्टर प्रतिस्पर्धीका रूपमा चिनिदै आएका छन् भने, यिबिचको खेल १४ सेप्टेम्बरमा हुने छ।

यदि दुबै टिम सुपर–४ मा पुगेमा २१ सेप्टेम्बरमा अर्को खेल हुन सक्ने सम्भावना रहेको छ । एशियाकप २०२५ को आयोजनाको जिम्मा भारतलाई मिलेको थियो। तर भारत–पाकबिच खराब सम्बन्धका कारण यो प्रतियोगिता न्युट्रल भेन्युमा खेल्न लागिएको हो।

पाकिस्तानले भारतीय भूमिमा कुनै पनि हालतमा नखेल्ने बताए पछि प्रतियोगिता युएइमा हुने भएको हो । यसअघि भारतले पनि पाकिस्तानमा आयोजना भएका प्रतियोगिताहरुमा आफ्ना खेल न्युट्रल भेन्युमा खेल्दै आएको छ।

कुल ८ राष्ट्र सहभागी रहेको प्रतियोगितामा समूह ए मा भारत, पाकिस्तान, युएई र ओमान रहँदा समूह ‘बी’ मा बंगलादेश, श्रीलंका, अफगानिस्तान र हङकङ रहेका छन्।

एसीयाकपको सुरुवात १९८४ मा भएको थियो। अहिलेसम्म यो प्रतियोगिता १६ पटक भएको छ। भारतले यो प्रतियोगिता सर्वाधिक ८ पटक जित्दा श्रीलंकाले ६ र पाकिस्तानले २ पटक जितेको छ।