रास्वपाले सार्वजनिक गर्याे रूपन्देही–३ उम्मेदवार बन्न चाहने आकांक्षीकाे नामावली

Breaking News

- न्यूज नेपाल

काठमाडौं । रूपन्देही–३ को उपनिर्वाचनका लागि राष्ट्रिय स्वतन्त्र पार्टी (रास्वपा)ले उम्मेदवारहरूको नामावली सार्वजनिक गरेको छ।

आवेदन दिनेहरुमा रूपन्देहीका सुलभ खरेल, भैरहवाका पार्थिवेन्द्र उपाध्याय, सिद्धार्थ नगरका डा‍. लेखजंग थापा, ज्ञानु पौड्याल, जितबहादुर गुप्ता (शेखर), कुसुम महर्जन, मधु अर्याल, रचना क्षेत्री, पुनमकुमारी अग्रवाल छन्।

रास्वपाले साउन ७ गतेदखि २१ गते अपराह्न ५ बजेसम्म उम्मेदवारीका लागि आवेदन माग गरेको थियो । त्यसमा ९ जनाको उम्मेदवारी परेको पार्टीको सहमहामन्त्री विपिनकुमार आचार्यले जानकारी दिए।

रास्वपाले शनिबार नै नामावली प्रकाशन गरेर साउन २५ गते उम्मेदवारहरूसँग छलफल गरिने रास्वपाले बताएको छ। आकाङ्क्षपपी उपर शुक्रबार र शनिबार दाबी विरोध आह्वान गरिएको छ।

साउन २६ गते उम्मेदवारहरूको प्रारम्भिक नामावली सार्वजनिक गर्ने र साउन २७ देखि भदौ ११ गतेसम्म लिडरसिप एकेडेमी, पोलिटिक प्रोक्सिमिटी र समावेशिता मापन गरिने रास्वपाले बताएको छ।

त्यस्तै, भदौ १२ र १३ गते तीन जना उम्मेदवारहरूको बीचमा प्रारम्भिक निर्वाचन गराइने र भदौ १५ गते उम्मेदवार तय गरिने रास्वपाले जनाएको छ।

यहाँ २०७९ मंसिरमा भएको प्रतिनिधि सभा निर्वाचनमा राष्ट्रिय प्रजातन्त्र पार्टीका उम्मेदवार दीपक बोहरा निर्वाचित भएका थिए । उनको निधन भएपछि रिक्त पदमा उपनिर्वाचन हुन लागेको हो । रूपन्देही–३ मा आगामी कात्तिक १७ गते उपनिर्वाचन हुँदैछ।