मुख्यसचिवसहित सुरक्षा प्रमुखद्वारा संयमित हुन अपिल !

breaking news

काठमाडौं । राजधानी काठमाडौंसहित देशका विभिन्न स्थानमा जारी प्रदर्शनका क्रममा जनधनको ठूलो क्षति भएपछि प्रमुख सुरक्षा निकायका उच्च अधिकारीहरू र सरकारका प्रतिनिधिहरूले संयमता अपनाउन अपिल गरेका छन्।

सार्वजनिक रूपमा जारी गरिएको अपिलमा ज्यान गुमाएका नागरिकप्रति गहिरो श्रद्धाञ्जली व्यक्त गर्दै पीडित परिवारप्रति समवेदना प्रकट गरिएको छ। साथै, प्रधानमन्त्रीको राजीनामा स्वीकृत भइसकेको अवस्थालाई स्मरण गराउँदै अब थप हिंसा वा क्षति नहोस् भन्ने उद्देश्यले सबै पक्षलाई संयमित र शान्तिपूर्ण रहन आग्रह गरिएको छ।

अपिलमा सहमति र संवादबाट समाधान खोज्नुपर्नेमा जोड दिँदै राजनीतिक दलहरूलाई वार्ता र मेलमिलापको बाटो रोज्न आह्वान गरिएको छ। देशको शान्ति, स्थायित्व र जनताको सुरक्षाका लागि वर्तमान परिस्थितिमा अधिक जिम्मेवारीका साथ प्रस्तुत हुन आग्रह गरिएको छ।

सार्वजनिक अपिलमा हस्ताक्षर गर्ने उच्च अधिकारीहरूमा मुख्य सचिव एकनारायण अर्याल, प्रधान सेनापति अशोकराज सिन्देल, गृह सचिव गोकर्णमणि डुवाडी, नेपाल प्रहरीका महानिरीक्षक चन्द्रकुवेर खापुङ, सशस्त्र प्रहरी बलका महानिरीक्षक राजु अर्याल र राष्ट्रिय अनुसन्धान विभागका महानिर्देशक हुतराज थापा छन्।