बल्लतल्ल पायो नेपाली टोलीले भिसा, सोमबार प्रस्थान गर्ने !

breaking news

- न्यज नेपाल

काठमाडौं । अागामी साता वेस्ट इन्डिजविरुद्ध हुने तीन ट्वान्टी–२० शृंखला खेल्ने नेपाली क्रिकेट टोलीलाई संयुक्त अरब इमिरेट्स (दुबई)ले भिसा दिएको छ ।

आइतबार क्यानले एक विज्ञप्ति जारी गर्दै भिसा प्राप्त भइसकेको जानकारी दिएको हो । नेपाल क्रिकेट संघ (क्यान)का प्रवक्ता छुम्बी लामाले यूएईले नेपाली टोलीलाई भिसा प्रदान गरिसकेको र सोमबार त्यतातर्फ प्रस्थान गर्ने जानकारी दिएका छन् ।

निर्धारित तालिकाअनुसार वेस्ट इन्डिजविरुद्ध हुने तीन ट्वान्टी–२० शृंखला खेल्न नेपाली टोली शुक्रबार बिहान यूएई जाने तालिका थियो । तर भिसा नआएकाले नेपाली टोली रोकिएको थियो । जेन–जी प्रदर्शनपछि नयाँ सरकार बनेयता यूएईले नेपालीहरुका लागि पर्यटक भिसा र कामदार भिसा दुबैमा रोक लगाएको छ ।

खेलाडीहरुले भिसा नपाएपछि शृंखला नै नहुने हो कि भन्ने अन्योलताका बीच क्यानले आइतबार भिसा आइसकेको र सोमबार नेपाली टोली त्यसतर्फ प्रस्थान गर्ने जानकारी दिएको हो ।

वेस्ट इन्डिजविरुद्ध सेप्टेम्बर २७, २९ र ३० मा शारजहाँमा तीन खेलको ट्वान्टी–२० शृंखला खेलेपछि नेपाली टोली ट्वान्टी–२० विश्वकप एसिया–प्यासिफिक छनोटमा प्रतिस्पर्धा गर्न ओमान जाने कार्यक्रम छ । त्यसपछि नेपालले पुनः यूएईमै आएर यूएई र अमेरिकासँग लिग २ मा प्रतिस्पर्धा गर्नेछ ।

मुख्य प्रशिक्षक स्टुवार्ट ल भने शुक्रबार नै दुबई पुगिसकेका छन् । साथै उनका अनुसार स्ट्रेन्थ एन्ड कन्डिसन प्रशिक्षक अब्दुर सतार पनि भारतबाटै दुबई पुग्ने कार्यक्रम छ ।